- Publika iha: 12 Setembro 2014
Membru Parlamentu Nasional kestiona maka’as kona ba uma Millennium Development Goals (MDG) ne’ebe lolos harii ba ema kbi’it la’ek sira, maibe agora balun sai fali postu polisia nian.
Deputadu Natalino dos Santos, hateten planu governu husi inisiu harii uma MDG ne’e atu fo ba ema vulneravel.
“Maibe tanba saida uma MDG iha bairo Beto Timur ne’eba agora sai fali fatin ba polisia,” Deputadu Santos kestiona, iha plenaria Parlamentu Nasional.
Nia dehan, kuandu agora polisia mak okupa fali fatin ne’e oinsa ho ema vulneravel sira. “governu halo ne’e bazea ba dadus,” nia dehan.
Hatan kestaun ne’e Ministra Solidaridade Sosial (MSS), Isabel Amaral Guterres, rekonese iha uma MDG balun polisia okupa atu fo seguransa ba komunidade, maibe uma MDG ne’ebe polisia sira uja ne’e hanesan fatin restu.
“Sei karik persija duni hanesan polisia laiha fatin, konserteza tenke ajuda tanba sira fo seguransa ba ita,” Ministra Guterres hateten.
Entretantu Komandante Operasaun, Superintendente Armando Monteiro, hateten Uma MDG iha Beto Timur ne’ebe agora sai fatin postu polisia ne’e uja temporariamente deit.
“Ita hatene katak iha ne’eba problema sempre mosu, entaun komunidade ejiji atu tau postu ida iha ne’eba, tanba fatin seluk laiha, entaun ita uja deit uma MDG ne’e,” Komandante Monteiro hateten.
Maibe, nia dehan, antes membru polisia sira okupa fatin ne’e hetan duni konkordansia husi Ministeriu Solidaderidade Social.
