Insidente Baucau La Fo impaktu Ba Estabilidade Rai Laran

Insidente foin lalais iha suku Sailari, Distritu Baucau, ne’ebe rezulta membrus Polisia Nasional Timor –Leste (PNTL) nain neen  hetan kanek, tuir Komandante Operasaun Superintendente  Armando Monteiro, sei la fo impaktu ba estabilidade iha rai laran.

Tuir Komandante Monteiro agora dadaun polisia kontinua haforsa patrullamentu iha rai laran no haforsa operasaun seguransa, implementa lei no orden.

“Ami mantein seguransa rai laran, operasaun la’o hela iha terenu,” Komandante Monteiro hateten iha nia knar fatin Kaikoli, Dili.

Nia hatutan, membrus nain rua husi nain neen ne’e, polisia feto ida no mane ida mak hetan kanek todan, e agora dadaun halo hela tratamentu iha Ospital Referral Baucau (ORB).

Iha mos kronologia ba akontesementu ne’e mak Komandante Monteiro esplika katak iha loron 15 fulan Janeiru 2015, tuku 4:30 lokraik wainhira husi eskuarda sub-distritu Laga ba halo patrullamentu iha area Sailari, derepente sira hetan asaltu husi grupu balun.

Komandante Monteiro, hateten ate agora husi parte Polisia seidauk bele koalia sai kona ba autor ba kazu ne’e, tanba seiduak halo investigasaun  ba konflitu ne’e no rezultadu operasaun seiduak iha.

Iha fatin seluk Sekretariu Estadu Seguransa (SES), Francisco Guterres konsidera konflitu iha Baucau ne’e hanesan kazu kiik oan ida ne’ebe sei la fo influensia ga ameasas ba seguransa iha rai laran.

Tanba ne’e, nia husu ba komunidade atu hala’o nafatin atividade hanesan bain-bain no ba joventude sira labele monu iha manobra sira ne’e.

“Labele monu iha tentasoens sira ne’e, e kontinua nafatin hala’o aktividades,” SE Guterres apela.

Entretantu membru Parlamentu Nasional, Deputadu Francisco Branco, husu ba ema hotu atu labele konsidera konflitu iha Bauca ne’e perturba ona ba iha estabilidade nasional.

Tanba ne’e, nia husu ba polisia atu bele asegura seguransa ho masimu atu situasaun hirak ne’ebe akontese iha Baucau, labele akontese iha distritu seluk.

“Ita tenke fiar polisia, tanba sira nudar ita nia forsa, ita tenke fo konfiansa ba sira no fo apoiu ba sira,” Deputadu Branco sujere.