- Publika iha: 16 Fevereiro 2015
Parlamento Nasional aloka $500 miloens hodi harii konstrusaun portu foun iha Tibar, tanba Portu Dili nia volume ki’ik liu no kondisaun la permite para roo sira mak atraka iha ne’eba.
Tuir Prezidente Komisaun E (Infra-Estrutura, Transporte e Comunicacao) Deputado Pedro dos Martires da Costa hateten katak, tanba relasiona ho kondisaun portu Dili labele ona atu roo atraka.
“Ami tau $500 miloens konstrusaun portu Tibar, maibe faseandomento, tanba governu ho parseirus Publiku no Privadu (PPP) sira mos tau osan ba projetu ne’e,” Deputadu Martires hateten, iha Parlamentu Nasional.
Nia dehan, agora dadaun loke hela konkorsu ba iha kompania sira hodi apply ba obra ne’e. Portu Dili ne’e kada tinan-tinan hetan melhoramentu, maibe la responde ona ba evolusaun roo tama sai.
“Ita nia Portu Dili ne’e akomoda deit roo rua, kuandu roo bo’ot ne’e rua no ki’ik ne’e tolu, enkuantu roo tama mai Timor ne’e barak tebes-tebes,” nia dehan.
Governu planea ona harii portu foun iha tibar, prosesu konstrusaun tenderizasaun la’o hotu ona liu husi sistema pareseiru publiku I privado (PPP).
Nia estudu ne’e halo hotu ona ne’ebe sira mai apresenta iha komissaun E, komisaun E mos hato’o rekomendasaun tenki hadia sira nia planu nomos aselera sira nia kontratado.
Atu hahu konstrusaun tanba portu dili ne’e la akumoda ona ro tama sai
Iha parte seluk Diretor APORTIL Lino Barreto haktuir portu foun tibar ne’ebe loke husi governu sei iha prosesu nia laran.
Tanba ita halo portu bo’ot ne’ebe nia tenderizasaun iha fulan maiu ou junho tinan 2015 nia laran, kompania haat mak sei kompete hela.
“Kompania hat ne’e mai husi estrangeiru hotu maibe nia naran mak ami ladun dekora, tanba fo asistensia ne’e banku mundial ami somente akompania ho banku mundial deit,”hatutan nia.
Iha mos sorin seluk Diretor Kompania EDS Lino Lopes planu ne’e governu nia atu hari portu foun iha Tibar ne’e diak tebe-tebes bele fasilita husi nasaun seluk mai Timor-Leste.
“Maibe hau nia duvidas mak ne’e portu foun ne’ebe loke iha Tibar ne’e aban bainrua fo kompania ne’ebe kaer projetu ne’e hahu konstrusaun ne’ebe hotu,”dehan nia.
I kompania ne’e mos utiliza portu maibe selu deit taca estado la’os governu mak kaer rasik nia lima hanesan ita nia portu dili agora ne’e governu mak kaer la’os ema privadu.
