- Publika iha: 10 Novembro 2015
Project Manager United Nation Development Program (UNDP), Naldo Rei, hateten Polisia Nasional Timor-Leste (PNTL) hatudu ona progressu servisu ne’ebe signifikativu tebes.
Tanba nia dehan, iha tinan 2013-2014, UNDP selu peritu internasional hodi suporta PNTL iha parte Information Technology (IT), rekursus humanus, implementasaun planu estraregiku, iha relasaun publika no nia rezultadu hatudu involvementu membrus PNTL ativu tebes, no aprende ho lais liu.
“Progresu maka’as liu, ita la espera ke PNTL bele atinji ida ne’e iha tinan rua nia laran,” Manager Rei apresia.
Maibe, nia husu ba PNTL atu nafatin kolabora ho UNDP hodi kontinua suporta malu, hasa’e kapasidade membrus Polisia sira nian iha futuru.
“Ita tenke esforsu hodi hakbi’it PNTL, tanba sira mak kaer seguransa interna, asegura situasaun ho profesionalismu ba komunidade sira,” nia hateten.
Alende ne’e, nia mos husu ba PNTL atu hadia diak liu tan jestaun viaturas, nune’e bele fasilita atividades polisiamentu la’o diak liu tan iha future.
Iha parte seluk Komandante Jeral PNTL, Komisariu Julio Hornai, rekonese suporta ne’ebe mai husi UNDP.
“Sira selu ona peritu mai atu ajuda ita,tanba ne’e ita tenke aproveita hodi aprende,” Komisariu Hornai hateten.
Kona ba hadia jestaun viaturas, Komisariu Hornai dehan, rekomendasaun ne’ebe positive, tanba PNTL presiza duni aprende liu tan iha parte jestaun baze de dadus, jestaun manutensaun no kontrola mina.
