- Publika iha: 20 Junho 2012
Hafoin halo julgamentu ba dala neen, Tribunal Distrital Dili (TDD) hamonu sentensa ba Ministra Justisa Lucia Lobato tenki seluk multa no serve pena prizaun tinan lima.“Tribunal absolve krimi balu no kondena krimi balu, dehan hau halo duni korupsaun, hau tenke selu fali $4.000 dolares Amerikanu ba estadu, no mos hamonu sentensa tinan lima ba krimi,” hateten arguidu Lucia Lobato (08/06), iha TDD, Dili.
Arguidu Lobato akuzadu komete aktu Korupsaun, Kolusaun no Nepotismu (KKN), liu-liu ba prosesu sosa farda ba guarda prizionais Becora no Gleno.
Tuir Arguidu Lobato, nia parte lakohi halo rekursu maibe nudar sidadaun ne’ebe diak tenke simu saida mak Tribunal deside.
“Testamunha nain hat nia declarasaun dehan katak hau halo duni korupsaun, ne’e maka tribunal hamonu sentesa tinan lima ba kazu korupsaun mai hau,” dehan Arguidu Lobato.
“Diak liu hau simu tinan lima prizaun, tanba ne’e desizaun tribunal. Karik ida ne’e maka bele halo justisa iha Timor, diak liu hau tuir deit,” dehan Arguidu Lobato.
Entertantu Advogadu Sergio Hornai (defeza Lobato), katak nudar defensor, nia sei esforsu aan atu halo rekursu ba iha Tribunal Rekursu, maske nia kliente lakohi.
“Hau bele kompriende hau nia kliente nia liafuan, maibe hau hanesan defensor hau tenke interpretasaun iha situsaun ne’e ho prodenti, atu bele hare katak los ga lae,” Advogadu Hornai tenik.
Tuir nia, desizaun ne’e seidauk final tanba defensor sei iha tempu loron 15 hodi bele halo rekursu.
Iha Julgamentu ne’e diriji husi juiza Collectiva Idete Palmira, Paulo Teixera, Jose Maria Araujo, no Reprezentante husi Ministeriu Publiku Prokurador Felismino Cardoso, Jose Ximenes, Angelina Saldanha, no Arguidu hetan defeza husi Advogadu Sergio Hornai, Fernando de Carvalho, no Cancio Xavier.
