- Publika iha: 27 Outubro 2014
Diretora Nasional ba Prevensaun Konflitu, Lidia Lopes, hateten atu halakon konflitu iha bairo sira, Polisia Komunitaria (POLKOM) servisu hamutuk ho lideransa local hodi kontrola situasaun iha ida-idak nia bairo.
Tanba se la’e, tuir nia, susar atu halakon konflitu ne’ebe iha.“ Tanba ita nia polisia komunitariu foin mak hahu, entaun aloka polisia komunitariu hamutuk ho komunidade sira iha suku ne’e atu kontrola situasaun ne’ebe mak mosu,” Diretora Lopes hateten, iha Dili.
POLKOM nudar polisia komunitaria hanesan unidade ne’ebe foin estabelese, tuir nia, presiza hasae tan sira nia kapasidade kona ba prevensaun konflitu.
Nia mos sujere, atu fo edukasaun sivika barak liu ba iha joven sira kona ba oinsa mak bele halakon konflitu iha ida-idak nia bairo.
“Ami hala’o ona edukasaun sivika kona ba prevensaun konflitu iha distritu neen, Viqueque, Baucau, Aileu, Dili, Ermera no distritu Bobonaro,” nia hateten.
Nia dehan, sira nia programa prevensaun konflitu ne’e kobre deit distritus, liu-liu suku ne’ebe sempre iha konflitu no jovens barak involve iha konflitu ne’e.
Iha parte seluk membru Komisaun B (seguransa, defeza no negosiu estranjeirus), Deputada Ana da Conceicao Ribeiro, hateten prevensaun konflitu, la’os deit ba parte seguransa no autoridade local, maibe ema hotu nia kontabilidade nudar sidadaun Timorense.
“Bele mos servisu hamutuk ho parte igreja, kolabora halo prevensaun konflitu ne’ebe mak mosu iha fatin-fatin,” Deputada Ribeiro sujere.
Alende ne’e, nia mos husu ba inan aman sira tenke kontrola oan sira atu labele involve iha konflitu ruma ne’ebe sempre mosu no jovens mak barak liu involve.
“Tanba konflitu mai husi ida-idak nia uma laran mak lori sai mai liur,” nia dehan.
Entretantu Prezidente Conselho Nasional Joventude Timor Leste (CNJTL), Leovigildo Hornai, hateten kolia kona ba prensaun konflitu iha kontestu teoritiku ne’e ba ema ida-idak, tanba nudar umanu ne’e sempre iha problema rasik.
“Tanba hau haree konflitu nia natureza ne’e ba ema ida-idak atu uja sira nia sentiment, ezemplu hanoin kona ba negative joven sira provoka malu, ne’e mos sai konflitu ida,” Hornai hateten.
Nia rekonese, katak CNJTL la halo kontrolu ba joven sira iha bairo ida-idak, maibe sira nia parte servisu hamutuk ho xefe suku sira.
“Ami rona husi xefe suku sira, katak iha bairo ida ne’e iha konflitu,maibe ami dehan ba xefe suku no xefe aldeia sira para hakalma tiha sira,” nia dehan.
