- Publika iha: 22 Fevereiro 2016
Tinan 2016 husi Orsamentu Jeral do Estadu (OJE 2016) Parlamentu Nasional aprova orsamentu $28,931 miloens ba Polisia Nasional Timor-Leste (PNTL) ho intensaun atu hadia bens estar kada membrus polisia.
Membru Parlamentu Nasional, Deputadu Cesar Valente, hateten durante ne’e polisia sacrifikadu tebes, komunidades ejiji deit mak polisia nia komprementu ba misaun, no sira nia prezensa iha servisu, inklui garante sidadaun sira nian independensia no liberdade, maibe nunka haree ba polisia sira nia bens estar,
“Wainhira komandante jeral aprezenta ida ne’e ami mos aseita, tanba ne’e ami aumenta $28 ital miloens hodi haree ba abonus sira no allowance sira ne’e,” Deputadu Valente hateten, iha Parlamentu Nasional.
Nia espera, ho mudansa ida ne’e bele motiva ona PNTL hodi halo servisu, mesmu seidauk tau orsamentu especial ba sira nia bens estar, maibe iha kontijenti jerais ida ne’e, sira mos bele uza osan ne’e hodi haree ba sira nia bens estar.
Tanba, nia dehan, duranten ne’e polisia sira iha munisipiu dala ruma gasta sira nia osan hodi ense mina no gasta sira nia motor hodi tula vitimas inklui suspeitu sira.
“Iha ami nia fiskalizasaun mos ami detekta buat sira ne’e, ne’ebe ami tenke haree duni ba buat sira ne’e,” nia hateten.
Iha parte seluk Deputadu Agustino Lay, hateten orsamentu ne’e alende uza hadia bens estar PNTL nian, haree mos kona ba hasa’e kapasidade PNTL nian hodi garantia estabilidade iha rai laran.
Kestaun estabilidade ne’e, nia dehan, tenke harii husi baze, tanba ne’e Parlamentu iha tinan ne’e aumenta orsamentu ba instituisaun seguransa, hodi sosa tan motor hodi oferese ba Ofisial Polisia Suku (OPS), atu kontrolu situasaun iha suku hodi garantia pas no dame.
“Ita kria kondisaun ba sira, nune’e sira bele servisu, ita sosa motor, depois ba future ita hanoin oinsa mak halo uma ba sira iha sukus,” nia hateten.
Iha parte seluk komunidade Tome da Cruz, hateten nesesariu duni atu Parlamentu Nasional aprova osan boot ba PNTL, tanba sira nia servisu ne’e importante tebes ligadu ba seguransa rai laran nian.
Tanba iha munisipiu 13 ne’e kada loron sempre mosu konflito no PNTL nia prezensa ne’e importante tebes, atu atua seguransa.
“Sira presiza iha kareta no motor ne’ebe sufsiente atu nune’e konflito mosu sira ho lais atende, la’os konflito hotu ona mak sira foin mai,” nia hateten.
