OPS Presiza Kapasitasaun

Husu ba governu atu fo treinamentu ne’ebe diak liu tan ba Ofisiais Polisia Suku (OPS) hodi profesionaliza liu tan sira nia servisu iha baze.

Membru Parlamentu (MP) Nasional, Duarte Nunes  hateten sira nia servisu ne’e direita kedas ho komunidades, entaun presiza aprende maneiras barak hodi kria relasaun ne’ebe diak ho komunidades.

“Presiza fo treinamentu, tanba sira nia servisu ne’e hamutuk ho komunidade no servi ho direita, sira presiza hatene maneiras resolve kazu iha nivel suku,” nia hateten, iha Parlamentu Nasional.

Nia dehan, OPS bele rezolve kazu balun ne’ebe kategoria kma’an iha nivel suku ne’ebe sira servisu ba.

Nia rekonese, katak durante ne’e governu oferese ona treinamentu balun ba OPS, maibe ne’e seiduak sufsiente.

Alende ne’e, nia mos sujere ba governu atu kria kondisaun ne’ebe mais efetivu ba membru OPS sira iha baze.

Tuir nia, buat ne’ebe sai sasukat ba ema ida atu hala’o servisu ho professional depende mos ba situasaun no kondisaun ne’ebe iha.

Hatan ba kestaun ne’e Komandante Operasaun, Superintendente Xefe Henrique da Costa, hateten sira haruka ona OPS nain 30 ba tuir treinamentu iha Bali iha tinan 2016 ne’e.

Durante iha Bali, Indonezia, nia hateten sira sei aprende kona ba oinsa hakbesik aan ba komunidade, oinsa ho profesionalidade atende no simu kazu inklui rezolve kazu iha nivel suku.

Razoens PNTL hili Indonesia sai fatin destinasaun ba treinamentu ne’e, nia hateten tanba sira mos implementa servisu Polisia Komunitaria no atinji ona susesu lubuk ida.

“Iha treinamentu ne’e sira bele haree, hodi sai hanesan referensia no modalidade inklui motivasaun ida ba sira, nune’e mai bele implementa iha Timor,” nia hateten.

Antes ne’e, nia dehan iha membru OPS balun tuir ona treinamentu iha Bekasi (Indonesia), Jepang inklui Nova Zelandia.