- Publika iha: 13 Abril 2012
Atual Advogada no Diretora Fundasaun Fatuk Sinai Oe-Cusse (FFSO), Sansia Florensia Paixao Bano hateten falta de laboratoriu iha Distritu oe-Cusse difikulta servisu parte justisa nian, liu-liu bainhira atu halo teste DNA ba vitima violasaun sexual.“Ami sempre hasoru problema waihira kaer kazu paternidade no abuzu sexual tanba to’o agora iha ita nia rai laran seidauk iha laboratorium,” preokupa Advogada Bano, semana kotuk (23/03) iha nia knar fatin Santa Rosa, Distritu Oe-Cusse.
Advogada Bano hatutan, kazu paternidade hat (4) mak pendente iha Tribunal Distrito Oé-Cusse no vitima sira senti la iha justisa, tanba ne’e husu ba governo atu estabelese laboratoriu ida.
“Difikuldade ne’ebé ami infrenta maka ekipamentu teste DNA, tanba ami iha kazu hat e sei halo prosesu teste ran iha Australia ne’ebé maka finansia hosi Fundasaun Asia, no han tempu fulan ida ka to’o fulan rua, hau husu ba governo atu buka solusaun ba kestaun ida ne’e,” Advogada ne’e sujere.
Iha sorin seluk Defensor Publiku, Calisto Tout rekonese katak laboratoriu sai problema bo’ot wainhira halo justisa ba kazu sivl hanesan gravida ka isin rua.
“Ami defensoria publika distritu Oé-Cusse mos hasoru difikuldade iha kazu sivil gravidas nian wainhira atu identifka aman hosi labarik ne’e, pior liu nia inan rasik la hatene aman hosi kosok oan ne’e, entaun atu hatene ita presiza izame DNA,” informa Defensor Tout.
Tuir Defensor Tout, kazu violensia tantu sexual no domestika iha Timor-leste, Distritu Oe-Cusse aas liu.
NIa hatutan, kazu violensai domestika akontese dalabarak liu tanba ekonomia iha uma laran fraku.
Enkuantu Xefe de Bairo Santa Rosa husu ba governu atu estabelese laboratoriu ida iha sira nia distritu, nune’e bainhira iha kazu ruma ne’ebe presiza teste DNA, bele fasilita sira nia servisu.
