- Publika iha: 14 Novembro 2011
Tuir Sigundu Komandate Polisia Nasional PNTL, Komisariu Afonso de Jesus, katak, atu garante Eleisaun 2012 lao ho diak liu tan horas ne’e dadauk Polisia liu husi Komandante Jeral sei halo hela planu preparasaun oinsa atu desloka membru sira husi kampanha to’o eleisaun ninian.
“Planu ida ne’e ami halao hela, ami fiar katak iha 2012 ami bele implementa planu sira ne’e para atu asegura Eleisaun bele lao ho susesu, dame no paz nia laran,” hateten Segundu Komandante de Jesus, semana kotuk (13/10) iha Dili.
Nia haktuir katak atu kapasita membru PNTL diak liu tan, horas ne’e dadauk kontinua husu apoiu husi Nasoens Unidas nian atu fo sira nia apoiu tekniku, liu liu konaba kapasitasaun hodi hasai lideransa ba iha komandante distritu sira oinsa sira bele halo planu no jere sira nia rekursu humanus ida idak ninian ba iha Eleisaun 2012.
Entertantu Diretor Fundasaun Mahein, Nelson Belo, hateten Eleisaun 2012 atu lao ho susesu la os servisu Polisia ninian tomak deit.
“Estadu tenki presiza hare buat ne’e integradu, tanba iha ligasaun ba buat barak. Persiza lei ida nebe forte la halimar para CNE [Komisaun Nasional ba Eleisoens] bele regula politika nain sira nebe mak wainhira halo kampanha sira tenki kontrola diak ba sira nia membru sira,” hateten Diretor Belo.
Ni haktuir katak polisia nia knaar mak halo atuasaun ba ema nebe viola lei.
“Agora buat ne’e komo servisu integradu entaun liu liu politiko nain sira mos tenki hare, sigundu sosiedade sivil, Jornalista mos hare,” nia hateten tan.
Tuir nia katak eleisaun ne’e akontese loron ida deit entaun numeru Polisia la to’o para atu kontrola hotu sentru votasaun iha distritu sanulu resin tolu.
“Tan ne’e mak komunidade hotu hotu iha konsiensia diak atu fo seguransa diak ba Eleisaun, fo hanoin, eduka malu oinsa bele hakruk ba lei no orden nebe mak atu aplika ba iha prosesu kampanha to’o prosesu eleisaun nian no anunsia nia rezultadu,” Diretor Mahein dehan.
