- Publika iha: 29 Fevereiro 2012
Deputadu Elizario Pereira hateten Parlamentu Nasional (PN) aprova tiha ona Lei Kodigu de Trabalhu no oras ne’e dadaun Lai ne’e iha hela Prezidente da Republika no hein para atu promulga nune’e bele implementa.
“Prinsipiu ba lei ne’e, ema bolu dehan halo balansu entre empregador ho trabalhador e lei ne’e revoga ne’ebe mai husi tempu UNTAET nian,” hateten Deputadu Pereira, semana kotuk (07/02) iha Parlamentu Nasional, Dili.
Kona ba vantajen no desvantajen Lei Kodigu de Trabalho tuir nia bele sei garante dever no direitus ba trabalhador Timoroan sira no mos ba parte empregador sira.
“Katak rua-rua ne’e obedese hotu ba lei kodigu laboral ne’e,” nia tenik. “Nia la’o ba, nia implementasaun mak ita hare, lei ne’e ninia vantajen no desvantajen saida.”
Entertantu Vise Prezidente Komisaun H Parlamentar, Deputadu Eduardo Barreto, hateten Lei Kodigu Laboral hein deit Prezidenti da Republika promulga hodi publika ba Jornal da Republika.
“Lei ne’e para proteje ba trablhador sira, hanesan mos proteje empregador sira, para ida labele hanehan fali ida,” Deputadu Barreto katak.
Deputado Bareto hateten tan katak Lei Kodigu Laboral ne’e wainhira Prezidenti da Republika promulga tiha hodi publika iha Jornal da Republika, liu tiha fulan hat mak foin bele implementa lei ne’e.
Tuir nia, wainhira implementa lei ne’e sei hasae dignidade trabalhador hanesan ema trabalhador ida atu nune’e empregador sira la bele tan hanehan fali trabalhador.
