Diretora organizasaun Ba Futuru, Juliana Marçal hateten filme serial Domin Nakloke sai hanesan instrumentu ida ba instituisaun hotu, sosializa hasa’e konsiensia sosiedade nian kona ba violensia hasoru feto no labarik, tanba filme ne’e fo mensagen ne’ebe positive tebes.

Filme serial “Domin Nakloke” ne’ebe produs husi organizasuan Ba Futuru nudar instrument ida hodi konsiensializa sosiedade kona ba violensi hasoru feto.

Nia dehan, ida ne’e la’os filme primeiru ne’ebe Ba Futuru produs, antes ne’e iha ona filme serial badak ida kona ba feto fantastiku ne’ebe koalia kona ba protesaun labarik, disiplina positive, rezulusaun konflitu no seluk tan.
“Dala barak ita halo atividade prevensaun liu husi fahe informasaun, susar atu troka ema nia hanoin, maibe ho filme ema haree artista favorite sira ho karakter positive, sira bele kopia hodi halo mudansa ba sira nia hanoin no mentalidade,” nia hateten iha Farol, Dili.
Nia esplika, filme Domin Nakloke iha ona episode tolu ne’ebe koalia kona ba problema social ne’ebe komunidade sira liu –liu joven sira esperiensia iha sira nia moris lor-loron.
Nia dehan, topiku episode primeiru kona ba SELFI, topiku ne’e tarjeitu ba joven mane sira ne’ebe gosta kontrolu sira nia namorada (doben).
“Atu fo hanoin ba joven mane sira, katak hahalok kontrolu ne’e hahalok ne’ebe ladiak tanba bainhira kontrola demais bele afeita negative ba sira nia reasaun,” nia esplika.
Nia hatutan, episode segundu ho topiku HAKILAR SAI, topiku ne’e koalia liu ba problema violensia domestika.
Iha filme ne’e, nia dehan se deit mak rona no haree akontese violensia domestika iha vizinho bele uza instrumentu ou meus dere sanan atu dada publiku nia atensaun, tanba lei Kontra Violensia Domestiku fo dalan se deit bele halo keixa bainhira haree.
Alende ne’e, nia hateten iha mos informasaun sira kona ba organizasaun no instituisaun estado nian ne’ebe vitima bele husu tulun bainhira hetan violensia.
Episode da-toluk ho topiku LAE KATAK LAE, koalia kona ba violensia seksual liu –liu hasa’e konesementu sosiedade kona ba violensia seksual no asediu seksual ne’ebe la’os akontese deit iha isin lolon, maibe ho manda video pornografia mos.
“Objetivu bo’ot ba iha filme ne’e, mak atu atinji ba iha redusaun violensia kontra feto no labarik iha rai laran,” nia hateten.
Nia hatutan, filme ho durasaun 15 no 20 minutus ne’e disponivel iha meus media social hanesan Facebook no seluk tan inklui 500 CD iha knua Ba Futuru Comoro Dili bele hetan ho gratuita.
Nia informa, sei dezenvolve tan episode rua, maibe sei iha prosesu negosiasaun ho doadores sira hanesan DFAT Australia no Dezenvolvimentu Humanu PHD.
Filme ho versaun Tetun no Ingles ne’e sai fenomena iha sosiedade inklui mos iha nasaun 5 seluk hanesan Australia, tanba durante loron lima hafoin lansa iha ona 120,000 FB views.
Iha parte seluk, Sekretario Estado Joventude e Desportu Leovirgilo da Costa Hornai apresia ho inisiativa kreativu husi organizasaun foinsa’e sira nian ne’ebe produs ona filme ne’e.
“Importante tebes, liu husi media elektroniku ajuda tebes muda pensamentu no paradigma hanoin mane sira nian atu fo respeitu no hadomi sira nia kolega, parseiru feto iha sosiedade no familia,” nia hateten.
Nia enkoraja, Ba FUTURU no organizasaun foinsa’e sira atu kontinua halo asaun kreativu sira hodi kontribui ba iha mudansa radikal ba karakter ema nian no promove prevensaun violensia hasoru feto no labarik sira iha sosiedade.