- Publika iha: 25 Setembro 2020
Governo liu husi Ministerio Turismo Comercio Industria (MTCI), hatete sitius turismo religioso sira ne’ebe identifika ona inklui Santuario Ramelau, Santuario Aitara, Kristo Rei, nune’e mos iha Oecusse, maibe sei dezenvolve no promove fazeadamente, tanba tuir kbit governo nian.
Diretor Geral MTCI, Jose Quintas hateten, atu dezenvolve sitius religioso sira ne’e iha ona programa VII governo nian, nune’e mos governo hetan apoio husi Agensia Dezenvolvimentu Govenu Amerika nian USAID hodi dezenvolve.
“Dadaun ne’e governo hetan apoio teknika husi USAID hodi dezelvolve uluk sitius Nain Feto Ramelau. Ita finaliza tiha mak iha kontinua fali ba Santuario Aitara,” nia hateten.
Nia dehan, tuir lolos ne’e dezenvolve no finaliza dala ida maibe hare ba situasaun governo deside dezenvolve fazeadamente.
Nia dehan, turismo religioso sira ne’e governo identifika ona, sitius sira ne’e presija halo investimento hodi dezenvolve em termos de infrastrutura nune’e mos fasilidade seluk tan ne’ebe mak nesesidade.
“Sitius hira ne’e ita presija hadia, atu nune’e bele dada visitor sira nia matan nune’e sira bele mai vizita. Ita hare hanesan Nain Feto Ramelau kada loron ne’e turista nasional no internasional sira nia prejensa iha fatin refere lafalta,” nia hateten.
Tanba ne’e nia dehan, governo iha ona plano adekuado no kria ona lei ida, atu bele dezenvolve tan turismo religioso sira iha Timor-Leste hanesan Santuario Nasional Aitara, Cristo Rei nune’e mos iha Oecusse atu bele dadan vizitante sira atu vizita hanesan mos Ramelau.
“Vizitante sira ne’ebe mak vizita ita nia turismo religioso Ramelau durante iha fulan julho hamutuk 6,000 no kontribuisaun orsamento hamutuk 6,000 dolar, iha fulan Agosto vizitante hamutuk 7 mil no kontribuisaun 7 mil dolar, orsamento hira ne’e hodi halo fali jestaun ba fatin refere,” DG MTCI Quintas informa.
Enkauto nia dehan, governo mos serviso hamutuk ho parte igreja Católioca Timor-Leste atu bele alista no prepara dados atu bele dezenvolve hodi promove sitius turismo religioso sira seluk tan iha Timor-Leste.
Entretanto, Arcebispo Dom Virgilio do Carmo da Silva, hateten, Igreja servisu hamutuk ho Governo hodi promove fatin ne’ebe kategoria Turismo Religioso, atu vizitante sira bele vizita hodi halo orasaun atu manan graça Maromak nian, laos ba hare no sente deit paisagem furak Timor nian.
“Ita promove turismo religioso ita konsidera hanesan fatin sagrado atu ema haboot sira nia fiar, hetan força no kbiit, coragem atu continua halao moris ida nebe ho influencia Maromak nian,” Arcebispo Carmo hateten.
Nia fiar katak, fiar sarani nian tama ona tinan 500 resin tanba ne’e iha ain fatin kultura no religioso barak mak existe no dezenvolve ona husi serviso hamutuk igreja no governo barak mos seidauk identifika hotu.
“Igreja mak tau matan ba turismo religioso rasik, maibe dadaun ne’e ita serviso hamutuk ho governo atu identifika, fatin sira ne’ebe mak kategoria turismo religioso hodi dezenvolve atu nune’e bele promove fatin furak sira iha Timor nian, maibe liga mos ba ita nia fiar hanesan halo peregrinasaun,” nia informa iha salaun dioseze Dili.
Enkuanto nai dehan, destino turistiko religioso ne’ebe identifikado ona mak Santuario Ramelau, Cristo Rei-Dili, Cristo Liurai-Letefoho, Estatua Sao Joao Paulo II-Tasi Tolu, Nossa Senhora Peregrina-Fatubessi, Senhor Morto-Oe-Cusse, no Santuario Aitara no seluk tan ne’ebe iha hela processo identifikasaun.
Iha parte seluk vizitante Jefita de Jesus Trindade Lay hateten, fatin turismo religioso ne’ebe mak kada tinan nia ho familia halo peregrinasaun mak Santuario Ramelau, Aitara, no Fatubesi deit fatin seluk seidauk tanba ladun hatene.
“Maibe ita espera katak ho esforso ne’ebe mak governo no parte igreja halo hodi promove tan fatin turismo religioso sira seluk ne’ebe mak ema seidauk koiñese atu ema bele hatene hodi halo peregrinasaun no hasae sira nia devosaun ba Maromak,” nia hateten.