PNTL Kria Horario ba Movimento Kareta Kontentor Atu Evita Asidente

Polisia Komando Munisipio Dili kria ona horario hodi regula movimento kareta kontentor iha Dili laran, atu nune’e bele minimiza asidente trafiku, nune’e mos engrafamento iha kapital laran.

Komandante Tranzito Munisipio Dili, Inspektor Xefe Domingos Sarmento Gama hateten katak tuir horario ne’ebe mak polisia kria ona, autoriza deit movimento kareta kontentor hodi halo nia aktividade hahu husi tuku 8 kalan to’o tuku 6 dadersan hodi nune la bele kareta publiku ka privado no motor nia movimento duranet tempu loron.

“Horario ne’e ita halo ona tanba durante ne’e asidente trafiku ne’ebe mak akontese no rezulta ema lakon vida impakto husi kareta kontentor hamutuk 16,” Komandante tranzito Gama dehan.

Nia dehan, husi parte polisia mos kordena ho Diresaun Nasional Transporte Terestre (DNTT) oinsa atu bele kria tan lei ida hodi reforsa tan horario refere hodi bele implementa.

“Ita mos husu ba ministerio relevante atu hamosu fali despaxu ida hodi regulariza operasaun kareta kontentor sira,” nia hateten.

Nai dehan, dadaun ne’e seidauk iha lei ida hodi kontrola maibe, bainhira ministerio implementa ona horario ne’e, kareta kontentor sei la impede tan movimento iha oras serviso nune’e mos hamenus asidente.

Entretanto, Xefe Departamento Trafiku Terminais, DNTT, Joao da Silva hateten, DNTT kria ona lei foun ida hodi kontrola movimento kareta kontentor sira ne’ebe mak asina husi ministerio tolu inklui Ministerio Obras Publikas, Ministerio Justisa, no Ministerio Finansas.

“Lei ne’e ita kria ona maibe seidauk implementa tanba seidauk halo sosializasun hodi implementa ho horario ne’ebe mak ita nia polisia munisipio Dili oferese ona,” Xefe Departamento Cabral hateten.

Nia dehan, regulamento ba sirkulasaun kareta kontentor ne’e importante atu bele autoriza sira nia sirkulasaun iha tempo kalan nune’e labele hamosu engrafamento ka asidente trafiku iha oras serviso nian.

“Liu husi serviso koperasaun ne’e, oinsa ita bele hare implementa horario ne’e rasik nune’e kareta kontentor sira nia sirkulasaun tenke bazeia ba horario ne’e,” nia hateten.

Tanba ne’e nia dehan, husi parte PNTL ho DNTT sei esforsu makas nune’e bele implementa horario no lei ne’e rasik atu bele regula sirkulasaun kareta kontentor iha Dili laran.