- Publika iha: 04 Dezembro 2020
Sekretario Estado Formasaun Profesional no Empego (SEFOPE) haruka tan trabalhador Timoroan nain 162 ba serviso iha setor orti-Kultura iha Australia durante fulan neen (6).
Sekretario Estado SEFOPE, Alarico do Santos hateten, trabalhador nain 162 ne’e foti husi selesaun ne’ebe mak halo ona komposto husi Munisipio 12 no Rejiaun Admistrativa Espesial Oecusse-Ambeno (RAEOA).
“Selesaun ba trabalhador nain 162 ne’e la’os ita mak hili maibe naran hirak ne’e hakura ba iha ajensia iha Australia mak sira hili no halo kontrato haruka mai mai SEFOPE,” nia dehan.
Maibe nia dehan, konaba prosesu atu aranka nian mak SEFOPE organiza molok aranka ona ba Australia.
“Trabalhador Timor ona nain 162 ne’e ita haruka ba ba serviso iha area horti-kultura iha Tasmania, Australia, durante fulan neen,” SE Santos informa iha salaun Delta Nova, Dili.
Total trabalhador nain 162 ne’e komposto husi feto 59 no mane 103, no SE Santos husu ba trabalhador sira refere atu serviso ho diak no hadomi sira nia serviso atu nune’e bele lori buat diak mai Timor-Leste.
Entretanto, trabalhador Armando Castro hateten, oportunidade ne’ebe mak nia hetan nudar ema Timoroan no agradese bo’ot.
“Ami liu ne’e mos liu husi prosesu selesaun no ikus mai bele hetan oportunidade hodi ba serviso iha Australia,” trabalhador Castro hateten.
Nia dehan, hanesan Timoroan ne’ebe mak ba serviso iha ema nia rai tenke firmeza ho prinsipio ida katak sai trabalhador iha ema nia rai.
Alende ne’e nia promete katak hanesan Timoroan sira ne’ebe serviso iha ema nia rai sei hakruk ba normas hirak ne’ebe mak aplika iha ema nia rai nune’e bele hamorin Estado Timor-Leste nia naran iha ema nia rai.