- Publika iha: 04 Dezembro 2020
Durante fulan rua ona Unidade Patrulhamentu Fronteira (UPF) ne’ebe destaka iha pontu fronteira 72 iha Munisipio Bobonaro, Covalima, no RAEOA, la iha ai-han hodi han tanba sira la iha osan alimentar, no sira lor-loron konsumu deit ai-dila tahan ho supermi hodi hala’o sira nia misaun hodi asegura area fronteira.
Komandante UPF, Joao Sancho Pires hateten, dadaun ne’e efetivu sira ne’ebe mak destaka kada posto fronteira iha munisipio tolu refere la iha ai-han hodi bele sustenta sira nia energia halo sira nia misaun atu bele asegura krime kontrabando ne’ebe mak komete husi sidadaun sira.
“Ami lor-loron konsumu deit ai-dila tahan ho supermi no membro balun mos hetan moras tanba la iha ai-han durante fulan rua ona,” nia dehan.
Nia informa tan katak, supermi ne’ebe mak sira konsumu ne’e mos deve deit iha loja sira iha fronteira tanba UPF la iha osan hodi sosa.
“Iha Posto hirak ne’e Posto Tunu Bibi mak rezolve ona ai-han maibe posto seluk seidauk rezolve no sira kuntinua han ai-dila tahan hodi halo serviso,” Superientendente Sancio informa.
Entretanto Portavoz Komando Jeral PNTL, Superientendente Xefe Arnaldo de Araujo hateten, UPF sira ne’ebe mak infrenta problema konaba alimentasaun ne’e tanba falhansu iha tekniku ezekusaun nian.
“Dadaun ne’e ita rezolve ona iha posto balun seluk seidauk tanba sei iha prosesu nia laran no iha tempo badak komando sei rezolve,” Portavoz Araujo informa.
Tanba ne’e nia dehan, komando mos kordena hela ho ministerio balun atu bele apoio hela foos hodi apoio ba UPF sira.
“Ita kontakto ona ho parte Centro Longistiku Nasioal (CNL) hodi apoio foos ba kompanhia tolu hanesan Maliana, Oecusse, no Suai hodi hein osan alimentasaun nian,” nia informa.
Tanba ne’e nia dehan, bainhira osan alimentasaun nian sai ona entaun buat hotu la’o diak ona no osan alimentasaun sai tarde tanba prosesu iha governo mak atraza.
Tanba ne’e husu ba UPF nafatin mantein asegura fronteira no konsumu lai saida mak iha no iha tempo besik komando sei rezolve.