- Publika iha: 20 Janeiro 2021
Diretór Nasional Servisu Apoia Hospitalar no Emergensia, Doutor Nilton da Silva informa dadaun ne’e pasiente nain 25 hein hela transporte atu ba halo tratamentu iha rai liur tanba sofre moras kronika kankru no moras fuan, ne’ebe hospital nasional seidauk iha kapasidade atu fo tratamentu.
Nia dehan, tinan kotuk 2020, iha aviaun husi agensia nian ida ne’ebe husi Malaysia mai kada semana rua entaun pasiente sira aproveita ba halo tratamentu no pasiente balun deside liu husi terrestre, maibe agora difisil tanba fronteira aero no terrestre taka.
“Prosesu ne’ebe agora lao mak pasiente ne’ebe antri hela hamutuk 25, sira nia dokumentu prepara hela. Lolos sira nain 9 aranka iha semana rua liu ba, maibe la konsege tanba fronteiras taka,” nia hateten iha servisu fatin Kaikoli, Dili.
Nia dehan, tuir indikasaun ekipa Junta Medika pasiente sira ne’e ba halo tratamentu iha hospital MRCC-Indonesia tanba sofre moras kankru, fuan, no rins.
Nia hatutan, iha tinan 2020, sira simu karta aprovasaun transferensia husi junta mediku hamutuk pasiente nain 133, maibe konsege haruka deit nain 63, no seluk lakonsege tanba kondisaun grave labele ona halo transferensia, no balun hakotu iis tanba deit aplikasaun estado emergensia implika ba prosesu ne’ebe tarde.
Nia informa, pasiente ne’ebe halo hela tratamentu iha rai Indonesia hamutuk nain 14, iha hospital Singapura nain 10, no Malaysia nain ida (1).
Iha parte seluk, Presidente Ekipa Junta Mediku, iha Hospital Nasional Guido Valdares (HNGV), Espesialista Medisina Interna Mateus Pinheiro hateten situasaun agora sai obstaklu bo’ot ba servisu transferensia moras, no amesa ba vida pasiente tanba laiha opsaun seluk.
Nia dehan junta mediku hare liu ba kliniku iha indikasaun nesesario ba halo tratamentu iha liur tanba hospital nasional laiha rekursu no fasilidade atu halo intervensaun sira kontinua diskute no aprova.
“Ita laiha opsaun seluk ita tenke trata sira tuir baut ne’ebe it abele halo iha rai laran. Ita aprova ba rai liur, maibe aviaun laiha fronteira taka ita labele halo buat ida. Ne’e obstaklu bo’ot tanba ne’e diak liu investe iha rai laran,” nia hateten.
Nia dehan, tratamentu ba kankru bazeia ba diagnostika histopatologia hodi hatene tipu kankru no nia stadium, maibe labele halo iha rai laran.
Nia hatutan sira ne’ebe halo ona tratamentu inisio iha rai liur labele ba fali tanba fronteira taka no iha ne’e aimoruk laiha atu fo tratamentu ba sira.