- Publika iha: 14 Abril 2021
Ministra da Saúde, Doutora Odete Maria Freitas Belo hateten mate isin matebian ho inisial AB, ne’ebe hodiseik hakotu iis iha Hospital Nasional Guido Valdares (HNGV) tanba Covid-19 sei rai hela iha sala izolamentu Vera Cruz.
Nia dehan Covid-19 ne’e pandemia tanba ne’e laos deit desizaun ministerio da saúde nian, maibe estado nian atu responde ba situasaun sira ne’ebe akontese ligadu ho Covid-19.
“Ita hare lolos lalaok ne’e, ema mate ona ministerio da saúde nunka trata, normalmente ministerio solidaridade social maka trata. Maibe asuntu Covid-19 ne’e pandemia ne’ebe laos ministerio ida deit hamutuk atu rezolve. Ita laos hasoru ema ne’ebe baibain ita hasoru lider Xanana, ami hanesan ministra labele rezolve ida ne’e iha autoridade ne’ebe a’as liu bele rezolve tanba laiha problema ida ne’ebe maka labele rezolve,” nia hateten fahoin halo audensia publika ho komisaun F iha parlamentu nasional.
Nia dehan ministerio da saúde nafatin kaer ba regras no protokolu ne’ebe iha katak ema ne’ebe mate ho Covid-19 tenke haloot iha Metinaru ho preparasaun ne’ebe apoia husi Centru Integradu Gestão Crize (CIGC) halo.
“Ita hotu hatene mate isin kuandu liu ona 24 oras ne’e ladiak ona tenke hasai. Hau nia pozisaun maka ne’e protokolu iha no ema ne’ebe a’as liu hau iha atu foti desizaun hodi apoia hau hasai mate isin ne’e husi fatin ne’eba tantu entrega ba familia ou lori tuir protokolu Covid-19 maka ne’e tenke lao tuir regras ne’ebe iha,” nia dehan.
Nia hateten husi prespetiva saúde prefere atu haloot mate isin ho protokolu Covid-19 nian tanba preokupa ho agrupamentu no tradisaun sira ne’ebe tanis lelir, hakuak malu bele sai fonte transmisaun virus ne’e.
Iha parte seluk, Presidente Cruz Vermelha de Timor-Leste (CVTL), Madalena Hanjan hateten ema hotu inklui mos lider karismatiku Kay Rala Xanan Gusmão iha direitu atu expresa tanba presiza esplikasaun ida ne’ebe klaru ba servisu sira ne’e.
“Hau hare ema hotu iha direitu atu expresa, ida ne’e avo nana maka expresa ita hotu-hotu hakfodak, maibe ema barak mos expresa individual, no seidauk iha ema balun fo resposta klaru ba sira atu sira bele hakmatek. Ne’e duni estado iha kompetensia atu hakbesik ba sira ne’e atu bele koalia, enkuantu seidauk sei hanesan ne’e nafatin,” nia hateten.
Nia dehan presiza meilhora kordenasaun entre governu no entidade barak atu ajuda responde ba situasuan ida ne’e, no ne’e kompetensia estado nian atu hare tanba lideransa nasional ne’e mos iha rajaun no governu mos iha rajaun.
Tuir observasaun TDW iha terenu hare katak, hahu hodiseik dadersan to’o ohin autoridade governu nian hanesan ministra da saúde, Doutora Odete Maria Freitas Belo, no Diretur CIGC, Brigadeiru Jeneral, João Miranda “Aluk”, Komodoro Donaciano Costa Gomes “Pedro Klamar Fuik”, no Xefe Estado Maior Jeneral Falintil-Forsa Defeza Timor-Leste (F-FDTL), Tenente Jeneral Lere Anan Timur halo kordenasaun ho lider nasioanl Kay Rala Xanana Gusmão hodi entrega mate isin ba estado haloot tuir protokolu Covid-19, maibe lider nasional ne’e la autoriza tur hein iha portaun sala izolamentu Vera Cruz tanba konsidera matebian mate tanba moras stroke laos Covid-19.