MdS Fo Prioridade Forma Espesialista Ba Moras Lahada’et

Diretora Nasional Rekursu Humanu, iha Ministerio da Saúde, Tomasia de Sousa hateten tuir planu rekursu humanu sei fo prioridade forma espesialista no sub-espesialista ba moras lahada’et hanesan cardiologia, oncologia, hemodealisa no medisina interna tanba moras aumenta makas.

Nia salienta tinan 2021, laiha bolsu estudu foun ba espesialista tanba situasaun surtu Covid-19. Maske nune’e tinan-tinan sira propoin vaga bolsu ba espesialista hamutuk 50 hodi bele prense servisu espesializadu iha hospital referal no sentru internamentu sira, maibe depende ba orsamentu.

“Sub-espesialista ne’e ita foin iha nain 3, ita hanoin mos ba oin ita tenke foti sub-espesialista, depende ba area ne’ebe mais importante no prioridade iha ita nia rai hanesan ba foti ona espesialista cardiologia tenke foti tan espesialista operasaun nian ou foti cardio ba labarik sira,” nia hateten iha servisu fatin Kaikoli, Dili.

Nia dehan dadaun ne’e foin iha sub-espesialista nain 3, espesialista nain 60 iha area oin hanesan medisina interna, pediatrician, obstetrician, cardiologista no seluk tan. No iha mos mediku espesialista Cubano nain 100 ne’ebe apoia hela servisu espesializadu iha hospital referal inklui sentru internamentu sira.

Nia hatutan tuir politika ministerio da saúde nian, sentru internamentu sira tenke iha espesialista medisina interna, pediatrician, obstetrician, maibe rekursu la to’o tanba ne’e sentru balun deit mak iha ho apoia husi mediku sira husi Cuba.

Nia informa tinan 2021, ne’e sira loke tan vaga permanente ba mediku espesialista hamutuk 34 iha area medisina interna, emergensia, cardiologia, hemodalisa, no seluk tan atu bele distribui ba hospital nasional nain 18 no seluk ba hospital regional no referal sira.

Entretantu, Diretor Executivu Hospital Nasional Guido Valdares (HNGV), Dr. Alito Soares hateten antes mosu surtu Covid-19 ekipa espesialista hospital nasional halao ona outreach ba komunidade sira iha area rural atu halo deteksaun sedu no prevensaun komplikasaun ba moras sira.

“Ita konsulta, hasai ran no halo mos ultrasonography atu identifika moras relasiona ho rins, fuan nian. Ba oin ita sei kontinua halao atividade prestasaun servisu espesialista iha komunidade,” nia hateten.

Nia dehan antes Covid-19 sira konsege halao atividade atendimentu espesializadu iha munisipiu Ermera suku Lauana, munisipiu Ainaro Cassa, Uaimaretula, Liquidoe no atividade ne’e identifika problema saúde barak.