Segunda, Junho 24, 2024
Total visitors: 766366

Família uma-kain sia (9) lakon sira-nia hela fatin, tanba kauza husi dezastre naturais ne’ebé mak akontese durante semana ida nia laran iha munisipiu hitu (7).

Família uma-kain sia (9) lakon sira-nia hela fatin, tanba kauza husi dezastre naturais.

Xefe Sesaun Relasaun Esterna, iha Autoridade Protesaun Sivíl (APC), Nelson Nunes Orleans, hateten dadus ne’ebé Sentru Nasionál Operasaun Protesaun Sivíl (SNOPS) rekolla durante semana ida nia laran husi munisípiu 7 hautudu katak família husi uma-kain 9 maka lakon sira-nia hela fatin tanba kauza husi dezastre naturais.

"Durante semana ida-ne'e ita rejistu hela fatin hamutuk uma 9 ne’ebé mak hetan estragus tanba dezastre. Dadus ne’e ita hetan husi relatóriu ne'ebé Sentru Nasionál Operasaun Protesaun Sivil," nia dehan.

Nia hatete, hela fatin 9 refere mak hetan estragus ne'e, ho komunidade afetadu hamutuk nain 40, kompostu husi munisípiu 7 inklui Bobonaro, Covalima, Díli, Ermera, Lautém, Viqueque no RAEOA.

"Tipu husi dezastre naturais ne’ebé rezulta hela fatin 9 ne'ebé ita rejistu mak anin sobu, rai halai, no ahi-han,” Xefe Orleans hateten.

Nia informa, husi akontesimentu dezastre naturais hirak ne'e ekipa Protesaun Sivil halo kedan levantamentu dadus no kontinua apoiu emerjénsia ba vítima sira no prosesu ba rekuperasaun hela fatin.

Entretantu, vítima Domingos Dias dehan dadaun ne'e sira hela de’it iha sede suku, tanba sira-nia uma ahi han tiha kauza husi sirkuitu eletrisidade.

"Ami-nia sasan la salva, tanba ahi han ho volume ne’ebé maka'as tebes no viziñu sira mai ajuda hotu, maibé la salva sasan nune'e mós osan hamutuk $4,000 iha armariu," vítima Dias dehan.

Nia hatutan, husi akontesimentu ne’e sira informa kedas ba ekipa protesaun sivil nune’e sira tun kedan foti dadus no fó ona apoiu emerjénsia kona-ba rekoperasaun mak seidauk.