Domingo, Julho 14, 2024

Diretór Sentru Saúde Munisipál (SSM) Aileu, João de Jesus, Sentru Saúde Munisípiu Aileu mós enfrenta hela problema kona-ba stock out ai-moruk hamutuk item ruanulu resin tolu (23), tanba ne’e difikulta komunidade sira ne’ebé presiza halo tratamentu iha sentru refere.

Diretor Ezekutivu Forum ONG Timor-Leste (FONGTIL), Valentim da Costa Pinto hateten, governu bele tau matan de’it ba ba seluk, maibé keta haluhan mós katak povu halerik hela ba saúde.

Nia dehan, stók out ai-moruk item 23 mak hanesan Amoxilin, ibuprofen, sarope ba labarik sira, Hydrocortison, Metronidazol evit Kinj, Cloxaxilin, no seluk tan. Aimoruk sira-ne’e stock la iha, entaun bainhira ema ba halo tratamentu pesoál saúde taka ho ai-moruk seluk, ou dala ruma pesoál saúde sira halo de'it reseita hodi ba sosa iha fatin seluk.

“Ami durante ne’e servisu kontinua la'o nafatin hanesan baibain. La'ós tanba ai-moruk la iha ne’ebé ami mós la halo servisu ne’e lae. Ai-moruk sira ne’ebé la iha ami sempre lori ai-moruk seluk hodi taka, ou ami halo reseita ba tratamentu iha sentru saúde seluk,” nia dehan liuhusi via-telefone.

Nia hatutan, pasiente sira ne’ebé ba mak ba halo tratamentu iha sentru saúde sira, dala ruma ai-moruk balun la iha, entaun pesoál saúde sira halo reseita ba halo fali tratamentu iha sentru saúde seluk, atu nune’e sira bele konsumu hodi bele rekupera lalais husi moras ne’ebé sira hetan.

“Ha’u husu ba parte relevante liuliu ministériu saúde trata lalais problema sira ne’e, tanba sentru saúde ida mak la iha ai-moruk ne’e problema. Tanba ne’e husu atu trata lalais problema ne’e, tanba problema saúde ne’e la'ós iha Aileu de'it, ida ne'e akontese iha munisípiu sira seluk mós, dala ruma HNGV rasik mós ai-moruk balun la iha,” dehan nia.

Iha parte seluk, Diretor Ezekutivu Forum ONG Timor-Leste (FONGTIL), Valentim da Costa Pinto hateten, governu bele tau matan de’it ba ba seluk, maibé keta haluhan mós katak povu halerik hela ba saúde, tanba ne’e haree lai ba problema saúde ne’ebé agora Timor-Leste enfrenta hela ne’e.

“Ita halo solidariedade ba nasaun seluk ida-ne’e mós di'ak, tanba ita haree fali kotuk bainhira Timor-Leste hetan problema, nasaun barak mak ajuda ita, tanba ne’e solidariedade ne’e di'ak, maibé la bele haluhan katak ita mós agora enfrenta hela ba problema saúde.

Problema saúde mak ai-moruk la iha, ema moras atu ba konsulta maibé ai-moruk la iha, ida-ne’e problema, tanba ne’e husu atu haree uluk lai problema sira ne’e depois mak ita halo solidariedade ba nasaun sira ne’ebé mak hetan problema,” nia dehan.

Nia salienta, problema Timor-Leste ne’e barak hela la'ós saúde de'it mak hetan, maibé edukasaun mós problema hela to’o agora la rezolve, foos folin sa'e, ida ne’e problema tanba ne’e husu atu rezolve uluk lai problema sira ne’ebé mak populasaun enfrenta hela.