Domingo, Julho 14, 2024

Polísia Nasional Timor-Leste (PNTL) liu-liu Departamentu Investigasaun Kriminál Nasionál halo ona prosesu ba autór ho inisial FZF ne’ebé mak halo kobransa ilegál no bosok dehan fasilita hodi ba servisu iha Austrália.

Polísia Nasional Timor-Leste (PNTL) liu-liu Departamentu Investigasaun Kriminál Nasionál halo ona prosesu ba autór ho inisial FZF ne’ebé mak halo kobransa ilegál no bosok dehan fasilita hodi ba servisu iha Austrália.

Komandante Investigasaun Kriminál, Inspetór Xefe Mozinho Correia dehan autór ne'e polísia halo identifikasaun no kaptura iha áreaDíli nian, liuhusi keixa ne’ebé mak vítima sira mai hato'o iha Investigasaun.

"Liuhusi keixa ne'e ita kaptura autór ne'e no submete ba sela detensaun hodi kumpri 72 oras no kuntinua prosesu ba Ministériu Públiku", nia dehan.

Nia dehan, autór ne'e bosok joven nain 20 hodi husu osan ho razaun katak bele fasilita dokumentu lalais hodi ba servisu iha Austrália.

"Total osan ne’ebé mak autór ne'e hetan husi kobransa ilegál ne'e hamutuk $17,000 resin husi vítima nain 20 ne'e," Komandante Correia informa.

Nia dehan, autór ne'e tenke aprezenta ba tribunal hodi kontinua prosesu, tanba nia komete krime kobransa ilegál ho montante ne’ebé mak boot tebes.

Entretantu, vítima Marta Tilman Ferreira dehan autór ne'e bosok sira dehan servisu iha Sekretariu Estadu Formasaun Profesional no Empregu (SEFOPE), tanba ne'e bele fasilita joven sira lalais ba servisu iha Austrália maibé tenke fó osan hodi trata dokumentu.

"Ami mós fiar no primeiru nia husu osan $500 kada ema hodi trata dokumentu. Ami fó depois nia husu tan osan tiket aviaun nian, kada ema montante la hanesan ona balu $500 balun $550 balun liuhusi total ne’ebé iha no dehan katak abril 24 ami aranka ona ba Austrália," nia hatete.

Nia hatete, depois iha dia 20 abril ne'e nia dehan sei falla iha dokumentu balun, tanba ne'e seidauk bele ba no tunda fali mós tenke aumenta tan osan.

"Ami mós koopera no kada ema tau tan osan $250 no dehan katak dia 2 maiu fixu ona ami aranka ba Austrália, maibé ami telefone ba nomor mate no buka nia la hetan. Ida-ne'e mak ami mai keixa iha polísia hodi buka tuir nian,” vítima Ferreira dehan.

Nia husu polísia atu halo prosesu ba autór no tenke selu fali osan ba vítima hirak ne'e, tanba osan ne’ebé vítima fó ne'e balun deve de’it.