Tinan Ne'e SNAEM Sei Sosa Tan Ambulánsia Ba Munisípiu Lima

Ministériu Saúde (MS) liu husi nia Diretór Jeral, Servisu Nasional Apoiu Emerjénsia Médiku (SNAEM) Simplicio Amaral hateten, tinan ne'e sei sosa tan ambulánsialima (5) hodi apoia ba Munisípiu lima (5).

Nia salienta, tuir planu estratéjiku tinan 2023-2027, kada tinan tenke sosa ambulánsia 5 hodi destribui ba iha fasilidade saúde hotu iha territóriu Timor-Leste, tanba sentru saúde sira balun ambulánsia komesa la di'ak ona.

"Ambulánsia 5 ne'ebé atu sosa ne'e sei apoia ba Munisípiu lima mak hanesan Munisípiu Liquiçá, Viqueque, Ermera, Covalima, no Díli. Maibé ita atu halo distribuisaun ba munisípiu lima ne'e, primeru ita uza hodi apoia lai ba vizita amu Papa nian ne'e, depois amu Papa fila ba Vatikanu mak ita halo distribuisaun ba munisípiu lima ne'e," nia dehan iha salaun CNE iha Kaikoli, Díli.

Nia hatutan, ambulánsia lima refere sei uza uluk iha vizita amu Papa nian ne'e, tanba ne'e partipasaun sarani sira iha Timor mós barak, no ema husi nasaun viziñu sira mós sei mai hotu, tanba ne'e presiza prepara transporte hodi apoia mós liuliu ambulánsia.

Nia salienta, ambulánsia 5 ne'e sei sosa iha Tailándia, tanba tuir esperiénsia MS no SNAEM sempre sosa iha nasaun ne'e, tanba ne'e ambulánsialima ne'e mós sei sosa husi Tailándia, ho orsamentu $320,000.

Iha parte seluk, Akademista husi universidade national UNTL, Deonizio Cabral, hatete governu presiza tau matan ba problema sira hanesan ne'e, tanba iha munisípiu balun ambulánsia kondisaun haree ba aat loos ona, dala ruma mós pasiente sira tula de'it ba karreta privadu mak lori mai sentru saúde, tanba kondisaun ambulánsia la di'ak.

"Governu tenke tau duni osan hodi sosa ambulánsia para distribui ba munisípiu sira ne'ebé ambulánsia komesa aat ona ne'e," nia dehan.

Nia dehan povu atu ba simu deit ai-moruk sei lao ain kuaze kilometeru rua hanesan ne'e, povu móras todan dala ruma tula de'it ba karosa mak lori ba ospital.

"Vizita amu Papa nian ne'e responsablidade boot Timor-Leste nian, tanba ne’e governu tenke prepara kondisaun, antes simu vizitasaun amu Papa, tanba iha eventu ne'e la’ós Amu Papa de'it mak mai, maibé amu sira husi nasaun seluk, no ema boot balun husi nasaun seluk mós barak mai, nomós maioria partisipa husi sarani sira iha Timor-Leste mós barak, tanba ne’e governu liuliu Ministériu Saúde tenke prepara kondisaun ho di’ak," nia dehan.