Estudante Na’in-Haat (4)Partisipa iha Kompetisaun Olimpiada Matemátika Iha Portugal

Estudante Ensinu Sekundária na’in-haat (4) reprezenta eskola hotu iha Timor-Leste hodi partisipa Kompetisaun Olimpiada Matemátika iha Portugal, kompostu husi nasaun sira membru Comunidade dos Paises da Língua Portuguesa (CPLP) nian.

Sekretáriu Estadu Ensinu Sekunadáriu Jerál no Tékniku Vokasionál Domingos Lopes Lemos, dehan,CPLP durante ne’e iha programa barak, maibé Ministériu Edukasaun envolve de’it iha Rede Escola Amigas, liu husi programa ne’e estudante Timor oan na’in-4 mak partisipa iha Kompetisaun Olimpiada Matemátika ne’ebé realiza iha Portugal.

“Premeira-ves Timor-Leste partisipa, estudante na’in-haat (4) reprezenta eskola hotu iha Timor-Leste ba partisipa iha Kompetisaun Olimpiada Matemátika, ho nasaun sira iha CPLP iha Portugal,” nia dehan.

Nia dehan, estudante nain haat (4) ne’e selesionadu husi Eskola Sekundáriu Jerál 5 de Maio, Eskola Café Dili, Colégio Santo Inácio de Loiola Kasait no kompetisaun ne’e resliza iha loron 28 fulan Jullu tinan 2024.

“Ita espera katak sira sei partisipa ho másimu no hatudu ba mundu katak Timor-Leste mós bele partisipa iha Kompetisaun Olimpiada Matemátika hasoru nasaun sira iha CPLP,” Sekretáriu Estadu Lemos informa.

Nia hatete, estudante na’in-haat (4) ne’e reprezenta Timor-Leste ba iha Portugal no hatudu valór di’ak, hatudu vontade di’ak, nune’e tuir kompetisaun ho susesu.

Enkuantu diak dehan, estudante nain haat ne’ebé mak reprezenta Timor-Leste partisipa iha Kompetisaun Olimpiada Matemátika iha Portugal ne’e kontribuisaun husi profesór matemátika ne’ebé durante ne’e hanorin ho métodu di’ak tebes.

Entretrantu Estudante Madalena Nossa Gorrete dehan, iha prosesu kompetisaun ne’e sira partisipa ho di’ak nune’e fila mai Timor-Leste bele lori rezultadu ne’ebé di’ak mai estudante Timor oan sira.

“Kompetisaun ne’ebé ami partisipa hanesan motivasaun ida ba estudante sira seluk hodi estuda badinas atu bele kompete ho ema seluk, hanesan mós ami nain-haat (4), ami agradese mós ba inan-aman no profesór sira ne’ebé durante ne’e uza métodu di’ak iha prosesu ensinu nian,” Gorrete dehan.

Tanba ne’e, nia rekomenda ba kolega estudante sira seluk tenke estuda makaas no hetan valór di’ak, nune’e bele ba partisipa iha kompetisaun sira ne’ebé Ministériu Edukasaun realiza.

Estudante hirak ne’e kompostu husi Eskola Sekundáriu Jerál 5 de Maio, Eskola Café Díli, Colégio Santo Inácio de Loiola Kasait no kompetisaun ne'e hahú iha loron 23 to’o 28 fulan Jullu tinan 2024.