- Publika iha: 30 Outubro 2024
Ministériu Edukasaun ho Banco Central de Timor-Leste (BCTL) implementa ona programa edukasaun literasia finanaseiru ba eskola hamutuk 200 iha territóriu laran tomak.
Ministra Edukasaun Dulce de Jesus Soares dehan, programa ne’e importante tebes hodi promove ba estudante sira, tanba sai hanesan koñesimentu báziku ba estudante sira atu bele jere sira-nia finanseira iha futuru.
Tanba ne’e nia dehan, Ministériu Edukasaun liuhusi servisu kooperasaun ho Banco Central de Timor-Leste hodi promove edukasaun finanseira ba eskola sira iha Timor-Leste.
“Ita implementa ona programa edukasaun literasia finanseira ne’e ba eskola hamutuk 200 iha territóriu laran,” ME Soares informa iha knaar fatin Vila-verde Díli.
Nia dehan, meiu sira ne’ebé mak Ministériu Edukasaun halo hodi promove edukasaun finanseria ne’e,liuhusi formasaun ba manorin hodi transmite ba estudante sira nomós halo monitorizasaun liuhusi ekipa konjunta ida entre Ministériu Edukasaun no BCTL rasik.
“Ita sei kontinua reforsa programa ne’e nomós buka meiu atu habelar liután ba eskola sira, tanba programa ne’e importante tebes atu bele eduka ita-nia foinsa’e sira bele jere didi’ak finanseiru inividual, família ka grupu iha futuru,” nia saliente.
Tanba ne’e nia dehan, ME iha responsabilidade tomak atu kontinua halo programa edukasaun literasia finanseira iha eskola sira iha nivel ensinu hotu iha eskola.
Entretantu Governadór Banco Central de Timor-Leste (BCTL), Helder Lopes hatete, programa edukasaun finanseira ne’e importante, tanba bele fó koñesimentu báziku kona-ba oinsá atu jere iha nivel individu, uma-kain nomós organizasaun, nune’e bele tulun hadia moris loron-loron nian ho rekursu finanseiru ne’ebé iha.
“Ami husi BCTL agradese tebes ba Ministra Edukasaun, no husu atu hatudu komitmentu no komprimísiu hodi servisu hamutuk hodi nafatin promove edukasaun finanseira iha ita-nia rain, atu bele fó benefísiu la’ós de’it iha tempu agora, maibé bele fó mós koñesimentu ba labarik sira hodi aplika iha futuru,” Governadór BCTL Lopes dehan.
Nia dehan, BCTL hein de’it avaliasaun husi ekipa konjunta no bazeia ba avaliasaun ne’e sei kontinua implementa edukasaun finanseira ba eskola sira ne’ebé seidauk implementa.