- Publika iha: 04 Novembro 2024
Ministériu Saúde (MS) hamutuk ho United Nations Population Fund (UNFPA) hala'o orientasaun ba fasilitadór iha Gia no protokolu kuidadus Antenatal no kuidadus Pós-natal ba profisionál Saúde sira husi Munisipiu 13 atu bele hadi'a kualidade liuliu tasa mortalidade inan ho bebé foin moris.
"Ohin Ita loke seksaun orientasaun ba pesoál saúde sira husi 13 Munisípiu, atu sai fasilitadór ba servisu Antenatal no Pos-Natal, liuliu ba tasa mortalidade inan ho bebé foin moris," hatete Assistant Representative, UNFPA Timor-Leste Domingas Bernardo ba jornalista sira iha Novo Turismo, Díli.
Nia esplika, iha giaun rua ne'e hanesan protokolu Antenatal no Pós-Natal ho objetivu wainhira sira fila oinsá halo planu atu orienta fali pesoál saúde sira hanesan parteira, Mediku sira ne'ebé servisu área saúde materna infantíl, atu hadi'a kualidade Servisu Antenatal no Pós-natal nian iha munisípiu 13.
"Ojetivu husi Gia rua-ne’e mak atu oinsá pesoál saúde sira ne'ebé servisu iha área saúde infantíl bele bele komprende di'ak liutan, hodi lori ita ba hadi'a kualidade servisu, maibé primeiru maka atu hatuun inan mate no bebé foin moris," nia esplika.
Nia informa, servisu Antenatal no Pós-natal ne'e servisu rutina iha postu-saúde no sentru-saúde sira ne'ebé maka iha servisu saúde materna infantil nian, atu iha parte ou lae, enfermeiru sira mós bele halo hela kuidadus Antenatal no Pós-natal.
“Gia nee maka ajuda sira atu halo servisu di'ak liu tan, tanba gia ne'e mós foun hela, entaun orientasaun ba pesoál saúde , tuir fasilitadór sira ne'ebé maka husi UNFPA no MS ho suporta fundos husi governu Japaun nia,” dehan Nia.
Iha fatin hanesan, Counselor, Deputy Head of Mission, Embassy of Japan in Timor-Leste, Sakai Yuki esplika, pontu importante liuba governu Japaun maka oinsá Timor-Leste bele iha dezenvolvimentu sustentavel hodi bele hala'o projetu ne'e ba oin.
"Importante liutan maka ami hakarak projetu ida-ne'e susesu lai, depois nia tenke halo impaktu boot entre munisípiu sira ne'ebé kobre iha programa Antenatal no pos-natal ne'e," nia deklara.
Nune'e mós, Xefe Departamentu Saúde Materna Infantil, iha Ministériu Saúde (MS) Lucia Lay dehan, agradese ba governu Japaun tanba apoiu fundu másimu ba MS liuliu Diresaun Saúde Materna Infantil liu husi UNFPA.
"UNFPA ne'ebé suporta makaas ba ita-nia atividade ne'ebé maka ohin loron ita realiza hanesan orientasaun ba fasilitadór sira iha protokolu kuidadus Antenatal no kuidadus Pós-Natal nian iha munisípiu 13," nia Informa.
Nia mós informa, aleinde programa ne’e, UNFPA suporta mós Programa Dirasaun Saúde Materna Infantil iha programa seluk hanesan iha Violensia Bazeia ba Jeneru, Saúde Produtiva, Planeiamentu Familiár, nomós seluk tan.