Kultura Tarabandu Hamenus Konflitu Iha Suku Maudemo

Kultura tarabandu ne’ebé halo iha suku Maudemo, postu-administrativu Tilomar munisípiu Covalima, konsege hamenus ona konflitu entre joven sira ne’ebé inklina aan iha Grupu Arte Marsiais (GAR).

Xefe suku Maudemo Maria Fátima hateten, kultura tarabandu ne’ebé halo iha suku Muademo ho objetivu atu hamenus konflitu iha suku.

“Kultura tarabandu, liu-liu tarabandu kona-ba konflitu ne’e ami foin aplika iha tinan 2024, nia objetivu mak atu bele hamenus konflitu ne’ebé akontese iha suku, ami halo tarabandu ne’e tanba ami atu halo joven sira ne’ebé envolve iha GAR bele iha unidade,” dehan xefe suku iha nia rezidénsia Maudemo.

Nia dehan, uluk bainhira halo eventu ruma iha suku laran, dalaruma iha problema, maibé agora konflitu sira-ne’e la akontese.

“Baibain kuandu iha eventu ruma iha suku, hanesan festa ruma ne’e sempre akontese problema, maibé bainihira ami halo tarabandu ne’e, problema sira-ne’e la akontese, tanba joven sira respeita ba regra ne’ebé iha,” dehan nia.

Nia salienta, bainhira to’o ona loron limpeza, joven sira hosi grupu arte marsiais oi-oin halo limpeza hamutuk iha suku laran.

“Iha suku Maudemo iha atividade limpeza iha loron Sesta-Feira, bainhira to’o tempu limpeza joven sira husi arte marsiais oioin, sira mai halo limpeza hamutuk no sira unidade loos, agradese tanba liuhusi tarabandu ne’e konsege kria dame iha sira-nia leet,” nia salienta.

Relasiona ho mudansa ne’ebé iha, reprezentante joven husi suku Maudemo Lino de Assis deklara, nia senti kontenti no apresia ba xefe suku Maudemo, tanba husi tarabandu ne’ebé halo, kria ona dame entre joven sira iha suku laran.

“Ha’u kontente loos no apresia ba xefe suku Maudemo, tanba tarabandu ne’ebé halo iha suku ne’e kria ona dame entre ami joven sira, liu-liu ami sira ne’ebé envolve grupu arte marsiais, liuhusi tarabandu ne’e ami joven sira bele kria paz no unidade iha ami-nia leet,” nia hakotu.