- Publika iha: 01 Dezembro 2024
Komunidade suku matai, postu administrativu Maucatar, munisípiu Covalima preokupa ho bee moos, tanba la asesu ba bee moos hahú husi ukun aan to'o agora.
Rosalina Tilman Gomes hanesan komunidade suku matai hatete, ema-nia moris pontu prinsipal maka bee moos hodi bele konsumu ba moris loron-loron nian, tanba bee laiha bele fó impaktu boot ba komunidade nia saúde.
"Ami preokupa ba bee moos hahú husi ukun aan to'o agora no ami sente lasatifas, tanba ita ukun aan kuaze tinan barak ona, maibé ita sei preokupa nafatin ba bee moos no ita hatene katak bee moos ne'e sai pontu importante tebes ba ita ema, liuliu ba ita-nia saúde, tanba saúde ne'ebé diak prezisa konsumu bee ho diak," dehan komunidade Rosalina.
Nia hatutan, sira sente triste loos, tanba bee matan ida uma-kain 6 ou 7 maka asesu no problema liu maka bee mai tuir tempu.
"Ami iha ne'e kona-ba bee moos ne'e problema boot tebes, tanba bee mai tuir tempu iha loron rua ka tolu ba aldeia ida hotu ba fali aldeia seluk, sira-ne'e maka sai problema to'o dalaruma ami bele problema, tanba hadau malu bee moos," haktuir nia.
Entretantu, Administradór Postu-administrativu Maucatar, Munisipiu Covalima Laurentino de Jesus hatete, komunidade sira iha postu Maucatar preokupa duni ba bee moos, maibé kona-ba bee moos ba sira iha, problema iha kanalizasaun.
"Ami iha postu Maucatar iha bee moos, maibé lasufisiente atu komunidade sira konsumu, tanba problema ida maka kanalizasaun ba bee moos ne'e hodi komunidade sira bele hetan no konsumu ho diak," dehan Administradór Postu-Administrativu Maucatar Laurentino iha sede suku Matai.
Nia hatutan, haree ba problema ida ne'e sira iha ona planu no kooperasaun ho parte relevante atu responde ba prekupasaun ne'e rasik.
"Problema bee moos iha suku haat iha postu Maucatar hanesan suku Beleasac, Hopilat, Tatai no Ogues, ami tenta ona halo proposta liuhusi konsellu konstrutivu hodi tetu ka taes iha postu hodi kontinua ba Munisipiu no parte seluk ami mos koopera ho BTL, EP hosi sira hahu identifika ona problema bee moos nian hodi tempu badak bele hadia ona," tenik nia.