- Publika iha: 01 Dezembro 2024
Ministériu Ensinu Superiór Siénsia no Kultura MESSK ho parseiru relevante hanesan UN Women, Ajénsia Kooperasaun Internasionál Korea (KOICA) inklui ensinu superiór sira implementa zero toleránsia ba asédiu seksuál iha universidade sira.
Ministru Ensinu Superiór Siénsia no Kultura MESSK José Honório da Costa Pereira Jerónimo dehan, implentasaun zero toleránsia ba asédiu seksuál iha universidade atu bele evita asédiu seksuál akontese entre dosente ho estudante, estudante ho estudante, funsionáriu sira.
Nia dehan, asédiu seksuál ne'e hahalok ne’ebé la di'ak no sei hamonu dignidade ema nian.
"Ministériu Ensinu Superiór Siénsia no Kultura (MESSK) servisu hamutuk ho parseiru relevante sira hodi implementa programa zero toleránsia ba asédiu seskuál iha universidade sira," nia hatete.
Nia dehan, implentasaun ida ne'e hodi hatete ba estudante sira, tenke brani hatete, sai katak, iha profesóres ka funsionáriu no estudante balun ne’ebé mak halo hahalok ladi'ak.
"Estudante sira tenke koa'lia sai bainhira hetan asédiu seksuál husi dosente ka estudante no funsionáriu sira," Ministru Honório hatete iha Hotel Timor, Díli.
Nia dehan, agradese ba universidade sira, tanba bele hola parte iha programa ida ne'e hodi implementa ho esperansa katak universidade sei implementa ho rigór.
Entretantu Reitór Universidade Nacionál Timor Lorosa'e (UNTL) João Soares Martinis dehan, iha UNTL antes ne'e implementa ona programa kampus seguru, nune'e mós ba implentasaun zero toleránsia ba asédiu seksuál iha universidade ne'e sai hanesan matadalan hodi reforsa tan kampus seguru ne'e.
"Implentasaun zero toleránsia ba adédiu seksuál iha universidade sira ne’e di'ak tebes hodi kombate asédiu seksuál kada universidade," nia hatete,
Iha parte seluk Reprezentante Sekretáriu Estadu Igualdade (SEI) Maria Belo dehan, inisiativa implentasaun zero toleránsia ba adédiu seksuál ba universidade ne'e di'ak, no importante ba kombate asédiu Seksuál.
"Ida-ne'e pasu importante ida atu ita hotu bele asegura katak la iha tan asédiu seksuál iha universidade, ida ne'e fó liberdade ba ita hamutuk hodi kombate," nia saliente.
Enkuantu nia dehan, implentasaun zero toleránsia ba asédiu seksuál ne'e mós nu'udar parte ida oinsá halo prevensaun ba violénsia bazeia ba jéneru.