- Publika iha: 01 Dezembro 2024
Parlamentu Nasionál husu governu liu-liu Ministériu Ensinu Superior Siénsia no Kultura (MESSK) atu reforsa kualidade iha nivél ensinu supérior bazeia ba programa sira iha Orsamentu Jerál Estadu tinan 2025 ne’ebé aprova ona.
Deputadu António da Conceição dehan, OJE ba MESSK tinan 2025 ne'e hamutuk $ 6,957,923, tenke utiliza ho di-di'ak hodi implementa programa prioridade tinan 2025 hodi hadi'a kualidade ensinu supérior.
"Husu ba Ministériu Ensinu Superiór Siénsia no Kultura (MESSK) atu ezekuta orsamentu ne'e ho didi'ak hodi reforsa kualidade iha nivél ensinu superiór iha Timor-Leste," nia hatete.
Nia dehan, hadia kualidade liuhusi formasaun ba dosente, tanba maioria universidade sira difikuldade iha kapasidade iha hamorin nune'e mós utilizasaun língua liu-liu portugés.
"Ita husu mós kontrola hodi regula didi'ak universidade sira liu-liu kona-ba loke kursu doutoramentu," nia hatete.
Entretantu Ministru Ensinu Supérior Siénsia no Kultura (MESSK) Jose Honório da Costa Pereira Jerónimo dehan, ministériu kontinua tau atensaun ba universidade sira liuliu Universidade Nasionál Timor Lorosa'e UNTL no Universidade Privadu sira.
Nia dehan, durante ne'e Ministériu apoiu Universidade sira liu husi orsamentu transferensia Pùblika no tinan oin kuntinua hodi hadi'a kualidade.
"Ita hadi'a kualidade liuhusi transferensia públika," Ministru MESSK Jeronimo dehan.
Nia hatete, governu nafatin esforsu liuhusi programa prioridade sira hodi hadi'a kualidade iha nivel ensinu superior sira iha Timor-Leste.