Quarta, Fevereiro 19, 2025

Vise-Ministru ba Fortalesimentu Instituisional Saúde (VMFIS) José dos Reis Magno husu komunidade atu hamoos bee dalan hodi bele kombate moras dengue.

Vise-Ministru ba Fortalesimentu Instituisional Saúde (VMFIS) José dos Reis Magno husu komunidade atu hamoos bee dalan hodi bele kombate moras dengue.

Nia dehan, agora ne'e tempu udan. tanba ne'e komunidade sira hamoos bee dalan, bee nalihun sira taka tiha, bee iha vazu sira-ne’e no troka atu nune’e susuk labele tolun ba.

"Ita-nia ambiente ne’e tenke kontrola no hamoos hela de’it, komunidade sira tenke haree bee iha tanki sira ne’e tenke hamoos bebeik no tau aimoruk ba para susuk mai tolun ba karik susuk tolun sira ne’e bele mate hotu," dehan Vise-Ministru Fortalesimentu Instituisional Instituisionál Saúde, iha Palasiu Prezidente Aitarak-Laran, Díli.

Nia hatutan, Governu liuhusi Ministériu Obras Públika halo servisu makas atu halo luan tan valeta sira-ne’e atu nune’e valeta labele intupidu bainhira tempu udan.

"Ita-nia Governu liuhusi Ministériu Obras Públika halo hela servisu makas atu halo luan tan valeta sira-ne’e, sela’e bainhira udan boot bee la sulin liu, tanba intupidu hela iha fatin, entaun bee labele sai liu, susuk ba tulun iha ne'eba amenta barak liutan," nia deklara.

Nia husu mós ba sidadaun sira hotu, bainhira hemu bee agua karik tenke soe iha lixu fatin, labele soe fali iha valeta, depois udan boot lori tun ba tasi dala ruma la to'o tasi, maibé intupidu hela iha fatin seluk, ida-ne'e problema, tanba ne’e sidadaun hotu tenke iha konsiénsia.

Nune’e Xefe Suku Comoro Eligio Jose Marçal hateten, problema moras dengue ne'e sei la hotu, tanba iha uma hun sira-ne’e komunidade sira soe foer arbiru de’it, bee foer husi haris fatin mós sulin arbiru de’it, ne'e susar atu kombate moras denge.

"Komunidade sira ne’e barak entaun foer ne’e naran soe deit iha uma sorin sira ne’e, bee foer iha husi haris fatin mos la subar, husik silin arbiru de’it, ida-ne'e mak problema ba ita, ita atu kombate moras sira ne’e komunidade mak tenke iha konsensia, atu labele soe foer arbiru," nia dehan.

Nia hatutan, komunidade sira iha Suku Comoro ne’e barak tebes no susar atu kontrola, tanba ne'e hanesan xefe suku husu ba komunidade sira atu iha konsiénsia soe foer iha lixu, ne'ebé durante ne'e governu prepara ona.