- Publika iha: 23 Dezembro 2024
Autoridade Protesaun Sivíl (APC) rejistu kazu ba dezastre naturais iha loron 2 to'o 16 fulan Dezembru tinan 2024 hamutuk rua-nulu resin neen (26).

Xefe Seksaun Relasaun Externa, iha Autoridade Protesaun Sivil (APC) Nasionál, Nelson Nunes de Orleans hateten, durante semana rua iha fulan Dezembru nia laran APC rejistu kazu afetadu ba dezastre naturais hamutuk komunidade uma-kain 26.
"Iha semana rua nia laran APC halo rejistu kazu dezastre naturais hamutuk 26, ne'ebé mai husi munisípiu sira hanesan, Ainaro anin sobu uma 1, Covalima ema mate 1, Ermera anin sobu uma 5, Lauten ahi-han uma 2 no anin sobu uma 3, Liquiçá ahi-han uma 3, Viqueque ahi-han uma 4, Aileu anin sobu uma 1, Dili anin sobu uma 1, Inundasaun uma 3, Manufahi anin sobu uma 2," dehan Xefe Seksaun Relasaun Externa, iha Autoridade Protesaun Sivil (APC) Nasionál, Nelson Nunes de Orleans, iha Caicoli, Dili.
Nia dehan, komunidade uma-kain 26 ne'ebé afetadu ba dezastre naturais sira hetan ona ajuda husi APC husi munisípiu sira, ba sira ne'ebé hetan estragus total ne’e APC foti de’it dadus no Komandu APC Munisipiu ho parseiru relevante sira fornese mós asistensia emerjénsia ba família afetadu sira.
"Ita fó ona apoiu emerjénsia hanesan, aih-han no la’ós ahi-han, ba familia afetadu sira, no Komandu Operasional APC iha Munisipiu sira sei kontinua halo levantamentu detailus kona-ba sasan ne’ebé estragus no lakon," nia koalia.
Iha fatin seluk, Reprezentante Prezidente Autoridade Munisípiu (PAM) Ainaro, Ruivo Barros Magno esposa, hateten iha Munisípiu Ainaro akontese dezastre naturais iha postu 4, maibé hetan ona apoia emerjénsia husi APC no Administrasaun Munisípiu Ainaro nian.
“Iha Ainaro dezastre akontese iha postu administrativu haat, maibé Postu Administrativu tolu mak halo ona apoiu emerjénsia no tuir mai sei apoiu tan postu ida hodi kompleta tan dadus postu 4 munisipiu Ainaro nian. Apoiu ne’e konjunta APC no administrasaun munisipiu nian, ” informa.
Nune’e mós,Vitima ba Dezastre Naturais Olinda Moniz esplika, sira-nia uma anin sobu mak maibé hetan ona apoiu emerjénsia husi Governu.
"Ami hetan nesisidade baziku husi ita-nia governu, no sira mai foti ona dadus atu kontinua apoiu ou lae, tanba ne’e ami hein de’it," nia afirma.