Sábado, Dezembro 05, 2020
Total visitors: 539094

Iha ambitu komemorasaun trajedia Balibo V ba dalan 45, Presidente Autoridade Munisipio Bobonaro, Jeferino Soares do Santos husu governu atu harii monumentu Balibo V atu dignifika journalista estranjeiru nain lima (5), rua (2) husi Australia, rua (2) Reinu Unido, no ida (1) Nova Zelandia, ne’ebe militar Indonesia oho iha tinan 1975 no sai historia ida ba jerasaun foun sira tuir mai hatene tuir.

Iha ambitu komemorasaun trajedia Balibo V ba dalan 45, Presidente Autoridade Munisipio Bobonaro, Jeferino Soares do Santos husu governu atu harii monumentu Balibo V atu dignifika journalista estranjeiru nain lima (5).

Nia salienta, governu iha politika atu prezerva historia sira iha passadu inklui trajedia Balibo V, maibe importante atu iha sinal ruma hodi hatudu ba jerasaun foun sira kona ba historia ne’ebe akontese iha tinan 1975, liu-liu jornalista nain lima nia mate.

“Fatin ne’e fatin historiku, buat hotu ne’ebe akontese iha ne’e hau hanoin membru governu sira tomak, oinsa bele tau netik sinal oan ruma ne’ebe bele hatudu nia historia ba jerasaun sira tuir mai hodi hatene,” nia hateten bainhira partisipa iha serimonia komemorasaun trajedia Balibo V, iha Postu Administrativu Balibo, Munisipio Bobonaro.

Nia dehan, estado no governu tenke garantia liberdade imprensa iha rai laran no trajedia sira hanesan Balibo V labele akontese tan iha tempu sira tuir mai.

Nia informa, jornalista nain lima mak Greg Shackleton, Tony Stewart, Brian Peters, Malcolm Rennien no Gary Cunningham, military Indonesia oho iha loron 16 Outubro tinan 1975, bainhira sira halao knar jurnalismu ho profesionalismu iha postu Administrativu Balibo, Munisipio Bobonaro.

Entretantu, Presidente Konselho Imprensa (KI), Virgilio da Silva Guterres hateten sira kontinua halo advokasia ho governu atu konsidera loron 16 Outobru sai hanesan eventu anual hanesan meius ida atu fo apresiasaun ba servisu komunikasaun social no sakrifisio jornalista sira tantu internasional no nasional nian ba luta libertasaun Timor-Leste nian.

“Ami halo koperasaun ho Ministerio Administrasaun Estatal ba oin tinan-tinan mai iha ne’e komemora loron ne’e hodi fo apresiasaun servisu komunikasaun social nian no mos sakrifisiu jornalista nain lima no seluk ne’ebe mai to’o iha ne’e halao kobertura,” nia hateten.

Hatan ba pedidu ne’e, Ministru Asuntu Parlamentar no Komunikasaun Sosial, Francisco Jeronimo hateten sei lori proposta ne’e aprezenta ba primeiru ministru Taur Matan Ruak no ministru relevante sira atu tau iha konsiderasaun tanba presiza duni iha sinal ida ba trajedia ida ne’e.

“Hau sei aprezenta ba primeiru ministru katak iha Balibo, autoridade hato’o pedidu proposta konaba harii monumentu ida atu refere ba ita nia jornalista sira ne’ebe mate iha Balibo tanba kauza Timor-Leste nian,” nia hateten bainhira partisipa iha komemorasaun trajedia Balibo V ba dala 45 iha Balibo, munisipiu Bobonaro.

Nia dehan, governu iha responsabilidade atu tau historia no memoria sira ne’e iha fatin atu ema hotu, liu-liu jerasaun foun sira bele hatene luta libertasaun ida ne’e ema barak mak sakrifika aan inklui mos ema estranjeiru sira hanesan jornalista sira ne’ebe mate iha tinan 1975 to’o 1999.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04