Quinta, Janeiro 21, 2021
Total visitors: 543967

Membru Parlamentu (MP), Deputada Isabel Maria Barreto Ximenes husu governu atu avalia fila fali papel Institutu Apoia Dezenvolvimentu Emprezarial (IADE) hodi hasa’e kapasidade no abilidade emprezario no negosiante non formal sira nian atu bele dezenvolve atividade ekonomia iha rai laran hodi kontribui hadia ekonomia familia no nasaun nian.

Membru Parlamentu (MP), Deputada Isabel Maria Barreto Ximenes husu governu atu avalia fila fali papel Institutu Apoia Dezenvolvimentu Emprezarial (IADE) hodi hasa’e kapasidade no abilidade emprezario no negosiante non formal sira.

“Ita hare durante ne’e implementasaun IADE diak, maibe hau hare la produtivu. Entaun hau sujere ba governu atu bele hare fali IADE nia papel mais ativu liu tan, laos fo deit apoia ba setor non formal sira registu iha sistema sosial hodi formaliza sira, maibe kapasita sira intermus oinsa halo negosio ho diak,” nia hateten bainhira halo audensia publika ho Ministerio Kordenador Asuntu Ekonomia no Institutu publiku sira iha plenaria parlamentu, Dili.

Nia dehan, iha planu rekuperasaun ekonomia governu atu apoia mos negosiante non formal sira tanba ne’e sira presiza iha kapasidade no abilidade ne’ebe adekuadu atu bele iha sustentabilidade ba atividade ne’ebe halao.

Entretantu, Deputada Maria Fernanda Lay preokupa ho empreza 100 resin mak taka atividade, maske parlamentu aprova ona osan hodi apoia empreza sira atu labele taka atividade no hasai trabalhador sira.

“Hau hanoin durante ne’e treinu ema buat ruma mak lao lalos tanba ne’e mak ita nia empreza sira la funsiona. Liga ba ida ne’e notisia ohin nian kompania 100 resin mak taka atividade ne’e saida mak ne’e. Governu tau osan atu apoia labele desperimentu, hau lahatene saida mak sala agora iha desperimentu,” nia hateten.

Nia dehan, proposta Orsamentu Geral do Estado tinan 2021, ba IADE aumenta makas $1 miliaun resin tenke hare fali programa formasaun sira ne’e atu ajuda duni empreza sira.

Iha parte seluk, Diretur Ezekutivu IADE, Filomeno Marçelino Belo hateten desde tinan 2016, orsamentu ba IADE lato’o $1 miliaun tanba ne’e sira enfreta dificuldade ba transporte atu fasilita atividade iha munisipio sira.

Nia dehan, IADE iha programa principal hat mak formasaun baziku no avansadu ba emprezario sira, programa kompetisaun planu negosio inovativu hodi fo oportunidade ba joven sira hodi hamosu ideia inovativu, programa asistensia teknika ba emprezario sira no ikus liu promosaun atividade negosio, liu husi organiza feira.

“IADE desde harii mai to’o agora, tinan lima ba kotuk laiha orsamentu ba kapital minor entaun ami hasoru dificuldade transporte. Tinan 2021 ne’e mak hetan oportunidade hatama orsamentu ba kapital minor, karik posibilidade $1.228,000,” nia hateten.

Nia dehan, IADE nia estabelesementu iha 12 munisipio no inklui Rejiaun Administrativu Espesial Oecusse Ambeno (RAEOA), maibe atividade sira lao depende ba orsamentu ne’ebe alokadu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04