- Publika iha: 19 Novembro 2020
Diretur Geral Agua no Saneamentu (DGAS) iha Ministerio Obras Publikas, Gustavo da Cruz hateten munisipio lima inklui Dili, Manatutu, Liquisa, Covalima, no Maliana, aplika ona tarifa bee moos no governu kontinua halo melhoramentu ba sistema kontador hodi hasa’e reseita bee moos nian ba Estadu.
Nia salienta, iha munisipio lima ne’e laos uma kain hotu, maibe uma kain balun deit hanesan iha Dili uma kain 16,000 mak iha ona metro kontador no sira selu ona tarifa bee moos.
“Ita hatene durante tinan hira kotuk ne’e reseita ki’ik tebes, maibe ami halo esforsu agora ami ultrapasa ona tarjeitu $200,000 tanba agora reseita ne’ebe kobra ona husi Janeiru to’o agora iha ona $250,000. Ekipa kontinua melhora sistema tanba atu hetan reseita tenke hadia metro kontador sira,” nia hateten hafoin partisipa iha audensia publika ho komisaun parlamentu nasional konaba proposta orsamentu jeral do estado tinan 2021, iha parlamentu nasional, Dili.
Nia dehan, ho autorizasaun husi ministerio finansas sira loke ona loket selu bee iha fatin tolu iha Dili, iha parte Kaikoli, Comoro no Kuluhun atu fasilita konsumedor sira selu bee ho fasil no lalais tanba tinan hira kotuk ba tenke ba forma iha banku BNU.
Nia hateten, komunidade sira ne’ebe uza ona metro kontador iha ona konsiensia poupa bee no bainhira uma kain hotu monta ona metro kontador mak ema hotu sei uza bee ho disiplina la estraga tanba kustu tarifa bee moso depende ba utilizasaun.
Iha parte seluk, konsumedor Mateus Soares hateten sidadaun iha dever kontribui ba dezenvolvimentu nasaun nian liu husi selu impostu sira hanesan bee, eletrisidade, no seluk tan, maibe governu mos iha obrigasaun atu fornese atendimentu ida ne’ebe diak ba povu.
“Hanesan sidadaun ita laiha duvida atu kontribui ba nasaun, maibe ita hakarak servisu asistensia sira ne’e iha nia sustentabilidade no ba ema hotu, labele ba komunidade balun deit hanesan agora ema barak seidauk kontribui ba eletrisidade,” nia hateten.
Nia dehan, bee hanesan fonte reseita ida ne’ebe diak ba estado, maibe estado mos tenke tetu kapasidade uma kain nian tanba bee ne’e nesesidade baziku vital ne’ebe ema presiza.