MSSI Aloka 1.3 Milhoes Apoio Instituisaun Sosial 28

Ministerio Solidaridade Sosial no Inkluzaun (MSSI) aloka 1.3 milhoes husi orsamento DOT nian ba intituisaun sosial 28 hanesan uma mahon, difisiente, orfornato, sentro komunitario no mos ONG sira ne’ebe mak ho karakter prevensaun no promosaun hakbit ema no familia kbit laek sira.

Ministra MSSI, Armanda Berta do Santos hateten, apoio ne’ebe mak governo apoio ba intituisaun social sira ne’e, atu bele apoio ba maluk familia kbit laek no mos vitima iha uma mahon sira durante fulan rua nian Novembro no Dezembro nian.

“Orsamento ne’ebe mak ita apoio ne’e hamutuk 1.3 milhoes no alokasaun ba instituisaun 28 ne’e diferente tuir proposta ne’ebe mak sira oferese,” Ministra Berta dehan.

Nia dehan, orsamento ne’ebe apoio ne’e mai husi orsamento DOT fulan Novembro no Dezembro nian.

“Apoio ne’ebe mak MSSI halo ne’e kada tinan sempre apoio maske ho orsamento duodesimo mos ita sempre apoio nune’e bele tulun ita nia instituisaun social sira hodi realiza sira nia programa,” nia informa.

Entretanto Diretor Ezekutivo Difisiente Matan Timor-Leste, Gaspar Afonsu hateten total orsamento ne’ebe mak sira hetan hamutuk $51,000 resin ba fulan Novembro no Dezembro nian.

“Orsamento ne’e ami sei utiliza hodi vizita ami nia kliente no aprosima sira hodi bele tuir formasaun letra brail no atende kazu violasaun sira hasoru, ami nia maluk feto, ho difisiente matan, salario ba staff no nesesidade organizasaun nian tanba fulan rua deit ita labele halo buat barak,” Diretor Ezekutivo Afonsu dehan.

Nia dehan, orsamento ne’ebe sira hetan ne’e sei ezekuta tuir nia dalan, tenke transparansia atu nune’e ema labele dehan katak difisiente la iha kapasidade.

“Ezekuta osan ne’ebe ami hetan husi governo ne’e ami hakarak tenke la’o tuir nia regra no implemeta tuir nia mata dalan ne’ebe mak Ministerio Sosidaridade Social no Inkluzaun oferese,” nia salienta.

Enkuanto total difisiente matan ne’ebe mak sira halibur hamutuk nain 56 ne’ebe mak durante ne’e sira halo asistensia.