Sábado, Fevereiro 27, 2021
Total visitors: 550453

Diretor kompania For T4, Enin, Osorio Xavier Verdial hateten produsaun forekeli iha rai laran sei menus tanba ne’e obrigado sira tenke halo importasaun forekeli husi Surabaya, Indonesia, atu prosesa tahu no tempe hodi distribui ba merkadu nasional.

Diretor kompania For T4, Enin, Osorio Xavier Verdial hateten produsaun forekeli iha rai laran sei menus tanba ne’e obrigado sira tenke halo importasaun forekeli husi Surabaya, Indonesia.

Nia salienta, durante aplikasaun estado emergensia ba prevensaun surtu COVID-19 fo implikasaun bo’ot tebes ba servisu produsaun tahu no tempe tanba sira hasoru dificuldade atu importa produtu forekeli husi liur.

“Forekeli ne’e ita hatama husi Surabaya, Indonesia. Produtu sira ne’e mai husi Amerika no Brazil tanba ita hare iha rai laran agrikultor sira la kuda forekeli. Sira balun balun kuda duni iha to’os ki’ik sira deit labele responde ba emprezario sira ne’ebe halo produsaun tahu no tempe,” nia hateten iha salaun Tower Fatuhada, Dili.

Nia dehan situasaun normal kada fulan sira hatama forekeli container 50 to’o 60 no loron ida produs saku tolu to’o hat, maibe iha situasaun surtu COVID-19 laran loron ida sira prosesa deit forekeli saku 1 ho balun.

Nia haktuir fulan Novembru laran forekeli la tama tanba ne’e industria tahu no tempe sira hasoru dificuldade atu produs tahu no tempe hodi responde ba nesesidade ha merkadu.

Nia informa produsaun ne’ebe sira halo durante ne’e distribui ba merkadu nasional, restorante, fatin han ki’ik sira no ba mos munisipio sira.

Iha parte seluk, Diretór Nasional Agrikultura Hortikultura e Extensaun, iha Ministerio Agrikultura no Peskas (MAP), Amaro Ximenes rekonhese importasaun produtu forekeli sei bo’ot tebes tanba produsaun rai laran sei menus.

Nia dehan sira seidauk fo sai dadus produsaun ba produtu forekeli iha rai laran tanba seidauk halo ubinan, maibe agrikultor balun iha munisipio Covalima parte Suai, Manufahi no Vikeke dezenvolve hela fini forekeli.

“Sim ita sei halo importasaun makas ba forekeli tama mai rai laran tanba ita nia produsaun sei menus. Ita foin tama iha sertifikasaun fini, bainhira sa’e ona mak ita tama ba fini komersial atu bele kontribui ba agrikultor sira hasa’e produsaun,” nia hateten.

Nia hateten fini forekeli mos sei importa husi rai liur tanba foin dezenvolve fini iha rai laran no hetan ona sertifikasaun, bainhira barak ona sei estabelese grupo hasa’e produsaun fini atu bele faan ba agrikultor sira.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04