Sábado, Fevereiro 27, 2021
Total visitors: 550453

Membru Parlamentu Nasional, Deputada Carmelita Caetano Moniz hateten implementasaun programa Cesta Bazika la refleta ba objetivu atu rekupera ekonomia rai laran tanba produtu alimentar barak hatama husi rai liur, liu-liu Atambua, Indonesia.

Membru Parlamentu Nasional, Deputada Carmelita Caetano Moniz hateten implementasaun programa Cesta Bazika la refleta ba objetivu atu rekupera ekonomia rai laran.

Nia dehan, parlamentu aprova osan ho montante $73 milhoens atu implementa programa Cesta Bazika hanesan intervensaun ida ba planu rekuperasaun ekonomia, maibe implementasaun mosu problema barak tanba aihan ne’ebe distribui ba povu kualidade ladiak.

“Aihan Cesta Bazika tuir ami nia konhesimentu barak mak hatama husi rai liur, husi Atambua, tanba ita nia stok la to’o. Ita atu rekupera se nia ekonomia, ekonomia rai laran ou ekonomia rai liur,” nia hateten iha plenaria.

Nia husu governu atu provizorio hapara distribuisaun aihan ba komunidade sira no halo lai avaliasaun hodi hare implementasaun fo duni kontribuisaun ba rekuperasaun ekonomai rai laran ou lae.

Nia mos husu Komisaun Anti Korupsaun (KAK) atu kontinua hare implementasaun programa ida ne’e tanba valor kontratu husi ministerio sira la hanesan.

Entretantu, Deputado Alexandrino Cardoso hateten programa Cesta Bazika ne’e diak tanba povu benefisio dupla, liu-liu sira nia produtu folin diak no sira hetan aihan, maibe presiza fo atensaun ba kompanhia implementador sira atu kumpri kompromisio ne’ebe iha.

“Loos duni produtu balun obrigatorio tenke sosa husi rai liur tanba rai laran laiha. Hanesan susu been tenke sosa husi rai liur tanba Timor-Leste ita la produs susuben no produtu sira seluk,” nia hateten.

Nia hateten, programa ida ne’e sai mos peskiza ida ba governu atu identifika produtu aihan ne’ebe presiza atu hasa’e produsaun hodi responde ba konsumu rai laran nian.

Hatan ba kestaun ne’e, Ministru Asuntu Parlamentár no Komunikasaun Sosial (MAPKoms), Francisco Martins da Costa Pereira Jerónimo katak sira registu preokupasaun sira hodi hato’o ba ministru kompetente atu buka solusaun ba problema sosial ne’ebe povu enfrenta.

“Hau registu preokupasaun lubun ida iha ne’e, ida ne’ebe hau bele fo informasaun hau fo hela, maibe sira ne’ebe relasiona ho kompetensia ministru sira seluk nian hau sei haruka ba sira atu fo solusaun ba problema sira ne’e,” nia hateten.

Nia dehan, preokupasaun barak mak implementasaun programa Cesta Bazika, kondisaun estrada iha munisipio ladiak, ponte balun kotu dificulta movimentu komunidade nian, suku balun seidauk asesu ba eletrisidade no bee moos no seluk tan.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04