- Publika iha: 09 Abril 2021
Diretora Ezekutivu Organizasaun Hamutuk Ita Ajuda Malu (HIAM Health), Rosaria Martins da Cruz hateten dezastre naturais, liu-liu inundasaun no erosaun ne’ebe akontese iha loron 4 fulan Abril tinan 2021, lori krize bo’ot baorganizasaun tanba fasilidade no ekipamentu hotu bee estraga.
Nia dehan rekursu ne’ebe sira iha atu fasilita servisu edukasaun nutrisaun ba komunidade no rehabilitasaun ba malnutrisaun hanesan transporte kareta 6, motorizada 10, jelador, no ekipamentu sira iha sentru kama, kulsaun, armari, no seluk tan hetan estragus total.
“Hau agora depende ba ema ruma laran diak, liu-liu doador sira ne’ebe hanoin atu tulun misaun organizasaun nian bele lao ba oin nafatin, entau ami sei loke hikas fali, maibe wainhira laiha suporta ruma ami hamos tiha tau sira no kareta sira kondisaun ladiak presiza osan bo’ot halo reparasaun maka ami sei taka,” nia hateten iha servisu fatin Aimutin, Dili.
Nia dehan dadaun ne’e sira iha hela programa bo’ot 2 atu implementa maka formasaun ba agrikultor sira kona ba agrikultur sensitivu nutrisaun, dezenvolve to’os komunidade, no reforsa programa governu nian to’os ba eskola iha munisipios.
Nia hateten akontesementu ne’e iha madrugada ho intensidade bee ne’ebe bo’ot kuaze metru 2 tanba ne’e transporte no sasan seluk inklui dokumentu organizasaun nian lakonsegue salva.
Nia hatutan kada tinan sempre akontese inundasaun, maibe tinan ida ne’e ho intensidade bee bo’ot tebes tanba konstrusaun uma no edifisio sira la organizadu tempu udan bee labele halai tuir dalan ho diak.
Nia informa seidauk iha ekipa husi governu nian maka tun ba terenu hodi halo levantamentu no identifikasaun ba estragus sira tanba dezastre ida ne’e afeta fatin hotu-hotu iha Dili laran.
Iha parte seluk, Ministru Obras Publika, Salvador Eugénio Soares dos Reis Pires hateten estudu viabilidade ba drenajen Dili remata ona tanba ne’e iha orsamentu tinan 2021, tau mos orsamentu ba planu infrastruktura atu halo drenajen principal.
Nia dehan projeitu sira ne’e lao iha tinan ne’e, maibe infelismente seidauk hahu, akontese uluk ona inundasaun.
“Estudu viabilidade ba Dili Drenajen remata ona. Projeitu ne’e nia orsamentu maka $350 milhoens, entaun ita tau fazeadamente. Fundu projetu ne’e $200 milhoens mai husi MCC tanba ne’e maka rekejitus nee’ebe ita halo ona iha tinan 2020, maka transforma diresaun jeral ba empreza publika ho autoridade. Ne’e ita halo hotu ona,” nia hateten.
Nia dehan intervensaun ne’ebe governu dadaun ne’e maka organiza kompanha sira atu mobiliza ekipamentu pesadu sira hodi normaliza infrastruktura sira, no halo identifikasaun ba estragus sira atu bele tau iha planu reparasaun.