- Publika iha: 10 Maio 2021
Governu Australia liu husi Embaixada Australia iha Timor-Leste no programa Timor-Leste Police Development Programme (TLPDP) harii ona postu haat (4) iha fronteira terestre hodi fasilita Unidade Patrolimentu Fronteira (UFP) husi Polisia Nasional Timor-Leste (PNTL) hodi halao seguransa iha area refere.
Vise Ministru Interior, Antonio Armindo, hateten postu 4 ne’ebe apoio kontrusaun husi governu Australia ba UPF-PNTL konstrui iha area Oefauk, Anin-Matan, iha munisipiu Bobanaru.
“Postu 4 ne’e hodi fasilita membru UPF bele hamanon hodi halo kontrolu mevimentu iha area fronteira terestre entre Timor-Leste no Indonezia,” nia informa.
Nia dehan, alende konstrui postu 4 ne’e, sei instala mos solar panel no fura bee moos hodi fasilita memebru sira ne’ebe koloka iha postu sira refere.
“Alende ne’e ita mos sei halo levantamentu hodi kuntinua hadia postu sira iha fronteira iha area Oe-cusse hanesan Sakato no Oesilu, no iha Maliana iha Tunu-Bibi no Mota ain, iha area sul iha Salele,” VMI Armindo dehan.
Entretantu, Komandante Jeral PNTL, Komisariu Faustinho da Costa, hateten katak postu 4 ne’ebe konstrui husi governu Australia liu husi programa TLPDP intrega ona ba komandu hodi bele utiliza.
“Iha postu 4 ne’e ita sei hahu koloka membru sira hahu semana oin kada postu membru UPF nain 18 hetan mos apoio seguransa husi Unidade Polisia Militar (UPM),” nia dehan.
Nia dehan, postu 4 ne’ebe mak intrega husi governu Australia ne’e nesesidade tebes hodi fasilita membru UPF sira iha area refere tanba durante ne’e sira hela deit iha baraka hodi halo seguransa iha fronteira.
Alende ne’e nia dehan, tuir planu ne’ebe mak sei kontrui tan postu ualu (8) iha fronteira terestre inkliu mos iha Acrema, iha ilha Atauru, hodi asegura ema ilegal ne’ebe koko tama husi ilha Lira, iha Indonesia.