Quinta, Setembro 23, 2021
Total visitors: 578526

Familia afetadu husi inundasaun fulan Abril 2021, hamutuk 140 oras ne’e dadaun kuntinua hela iha sentru evakuasaun tanba sira nia uma hetan estragus total no sira la iha uma atu hela.

Familia afetadu husi inundasaun fulan Abril 2021, hamutuk 140 oras ne’e dadaun kuntinua hela iha sentru evakuasaun.

Sekretariu Sekretaria Estadu Protesaun Sivil (SEPS), Joaquin Gusmao hateten, familia 140 ne’e kuntinua hela iha sentru evakuasaun inklui iha Dom Bosco, Colegio Canossa Hera, Sede Suku Manleuana, Metiaut, no China Rate.

“Familia afetadu 140 ne’e kada semana ita fo apoiu hahan inkliu sasan nesesidade baziku nune’e sira bele utiliza,” SEPS Gusmao hateten.

Nia dehan, governu iha ona planu hodi resolve hela fatin ba vitima 140 ne’e maibe tenke halo iha Hera nune’e sira labele ba okupa nafatin area risku ba dezastre naturais.

“Dadaun ne’e ita husu nafatin vitima sira atu pasiensa hodi hein governu identifika uluk fatin ne’ebe mak livre husi dezastre mak hodi konstrui hela fatin ba vitima 140 ne’e,” nia husu.

Alende ne’e nia dehan, total vitima afetadu husi inundasaun hamutuk 33.835 no mate hamutuk 44 iha teritorio laran tomak.

Entretantu, Xefe suku Comoro Eurico de Jesus hateten, hanesan autoridade lokal husu governu tenke konstrui uma ba vitima sira ne’ebe mak dadaun ne’e okupa hela sentro evakuasaun sira nune’e sira bele fila ba sira nia hela fatin no husik hela sentru.

“Ita husu governu atu bele rezolve lalais, tanba ita hare inan isin rua, labarik ki’ik sira ne’e terus loos tanba sira toba deit iha semente leten ne’e perigo loos ba sira nia saude,” Xefe Suku Comoro Jesus hateten.

Nia dehan, governu atu konstrui uma ba familia afetadu sira, labele konstrui fali iha fatin anterior maibe tenke identifika fatin ne’ebe mak seguru, atu nune’e sira labele sai vitima ba dala rua nune’e mos governu labele gastu ba dala rua.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04