Governu Kontratu Empreza 5 Distribui Sesta Bazika Ba Reklamante

Governu liu husi Ministeriu Turismu Komersiu Industria (MTKI) kontratu ona empreza lima (5) hodi sosa produtu lokal hodi halo distribuisaun sesta bazika ba reklamante sira nain 25.596 iha Timor-Leste laran.

Ministru MTKI, Jose Lucas do Carmo da Silva hateten, MTKI hanesan implementador ba programa sesta bazika tanba ne'e MTKI mak iha responsabilidade tomak hodi implementa.

Nia dehan, emprezariu 5 ne'ebe mak kontrata ona ne'e empreza rua toma konta ba iha Dili, ida responsabilidade iha Ermera, ida toma konta ba parte Leste, no ida seluk toma konta ba Ainaru.

"Total reklamante ne'ebe mak iha rejistu hamutuk 25.596 mai husi munisipiu hotu iha Timor," nia dehan.

Nia hateten, ba reklamante hirak ne'e emprezariu 5 ne'e hahu distribui ona iha semana kotuk hahu iha kapital munisipiu Dili no munisipiu Ermera, finaliza tiha mak hakat fali ba munisipiu seluk.

"Distribuisaun sesta bazika ba reklamante hirk ne'e tenke finaliza iha fulan Outubru ne'e, tanba reklamante sira ne'e hein kleur ona," Ministru MTKI Carmo dehan.

Nia hateten, kustu ba distribuisaun ne'e hamutuk 1.2 milhaun dolar americanu tanba ne'e husu ba kompania distribuidor sira tenke kumpri kontratu ho nune'e kada ema ida hetan ho valor $25 ba fulan rua hamutuk $50.

Alende ne'e nia dehan, kompanhia ida ne'ebe mak latuir valor iha kontratu ne'e hatudu inkoperativu ne'ebe mak tenke hetan sansaun.

Entretantu, Deputadu Mariano Sabino hateten, programs sesta baziku ne'e bazeia ba dekretu lei numeru 48/ 2020 hodi apoiu familia tanba impaktu husi pandemia global COVID-19 nian.

Nia dehan, programa sesta baziku ne'e mos parte ida hodi halo rekoperasaun ekonomia, tanba ne'e povu hotu iha direitu atu hetan sesta bazika.

"Ita husu governu atu bele rezolve sesta bazika ba reklamante sira tanba ema hotu iha direitu ba osan ho montante $50 dolar," nia salienta.