MAP Intrega Trator Hamutuk 56 ba Patrimoniu Estasdu Tanba At

Ministeriu Agrikultura no Peskas (MAP), intrega trator hamutuk 56 ba patrimoniu estadu tanba kondisaun at ona.

Diretora Geral MAP, Odete Maria do Ceu, hateten trator 56 ne'e husi munispiu 12, trator sira ne'e sosa kleur ona no la iha osan hodi halo manutensaun.

"Ita intrega fali trator 56 ne'e ba patrimoniu estadu hodi halo leilaun ba publiku tanba sira mak iha kompetensia hodi jere patrimoniu estadu nian," DG MAP Ceu hateten.

Nia dehan, trator hirak ne'e iha munispiu Aileu 1, Ainaro 4, Bobonaro 9, Baucau 5, Covalima 7, Dili 3, Ermera 2, Likisa 3, Lautem 5, Manatuto 6, Manufahi 5, Viqueque 6, total hamutuk 56.

“Ita kumpri lei ita identifika no foti ona dados no ita intrega diresaun patrimoniu estadu tanba ida ne'e sira nia servisu hodi halo prosesu leilaun," nia salienta.

Nia dehan, trator hirak ne'e iha momentu ne'eba governu ofrese ba grupu agrikultores sira mak jere no iha momentu ne'e mekanismu los, maibe nia implementasaun mak sala no ikus mai trator sira ne'e sai at deit.

Total tratores hamutuk 500 resin no sira ne'ebe mak sei diak no utiliza hela iha 294 trator.

Entretantu, Diretora Nasional Jestaun Patrimoniu Estadu, Timotia Pompeia, hateten trator 56 ne'ebe ba MAP ne'e rejista ona no hein ba prosesu leilaun.

"Ita rejistu ona ba prosesu leilaun no ita sei anunsiu ba publiku no nia kusto total kada traktor," DNJPE Pompeia hateten.