- Publika iha: 13 Outubro 2021
Sekretario Estado Ambiente (SEA) servisu hamutuk ho UNDP mobiliza brigadista ambiental hamutuk nain 450 halao asaun prevensaun dezastre naturais iha foho leten, liu-liu halo trasu, trava kadalak no kuda ai oan.
Diretora Sentru Edukasaun no Informasaun Ambiental, iha Sekretario Estado Ambiente (SEA), Aménica Machado Fernandes hateten asaun phase I brigadista hamutuk 147 hodi halao atividade iha zona sia kompostu husi zona kosteiru hat no foho leten iha 5. No phase II brigadista 303 halao atividade iha zona 21, maoria iha foho leten hahu husi Tasi tolu to’o Hera.
“Sira iha area kosteriu ne’e sira halo edukasaun ambiental, kuadro avizu, kuda ai-horis, atividade jardin verde. Sira iha area foho leten halo trasu, trava kadalak tanba ita hatene katak, agora dadun problema ambiente ligadu ho dezastre ne’ebe akontese hamosu inundasaun tan ai-horis iha foho leten laiha,” nia hateten iha servisu fatin Acait, Dili.
Nia dehan topografia Timor rai ho elevasaun ne’ebe a’as, entau kuandu la halo trasu, trava kadalak udan mai bee halai hotu mai iha sidade laran no sidade Dili nakonu ho bee hodi hamosu inundasaun iha fatin-fatin.
Nia hateten trasu no trava kadalak nia funsaun atu redus velosidade forsa bee ne’ebe mai husi udan tanba kuandu trasu no trava kadalak barak forsa bee estraga rai menus no bee la mai iha sidade laran tanba bee infiltra hotu ba rai okos atu konserva mos bee rai okos.
Nia informa hahu fulan Outubro tinan 2020, SEA halo lansamentu ba movimentu brigada ambiental ho objetivu atu involve foinsa’e sira halao asaun prevensaun ba dezastre naturais iha rai laran.
Iha parte seluk, brigadista Ferdiana Moniz hateten orgulho hola parte iha asaun prevensaun dezastre naturais tanba bele halo buat ruma ba nasaun no aprende baut foun ne’ebe labele hetan iha eskola.
“Sai brigada ambiental ne’e diak prontu kualker tempu halao servisu voluntarismu, Maibe hau sente triste tebes ho kondisaun iha timor tanba laiha espiritu voluntarismu atu dezenvolve no hafurak ambiente. Agora ita nia uma oin deit mos atu hamos tenke selu $3 tanba ne’e hau orgulho hola parte iha grupo brigada ambiental,” nia hateten.
Nia dehan durante halao atividade sira hasoru dezafiu no obstaklu barak, liu-liu wainhira halao atividade iha suku no aldeia hetan protesta makas husi komunidade sira tanba sira hakarak involve sira iha grupo laran.