- Publika iha: 19 Outubro 2021
Ministra da Saúde, Doutora Odete Maria Freitas Belo hateten kobertura vasinasaun Covid-19 ba populasaun elijivel idade tinan 18 ba leten iha munisipiu Ermera sei ki’ik 47% dose dahuluk no 15.5% dose daruak kompara ho munisipiu sira seluk ne’ebe atinjimentu liu ona 50% ba leten.
Nia salienta membru governu nain tolu mak lidera hela kampanha vasinasaun iha munisipiu Ermera no sira tama sai komunidade nia uma esplika vantajen vasina hodi konvense komunidade sira ho konsentemente simu vasina.
“Sira komu iha fatin do’ok liu laiha asesu ba komunikasaun no informasaun sira, entau informasaun falsu sira mak to’o uluk ba sira no sira grave hela iha kakutak susar tebes ita atu konvense fali. Entau hakarak lakohi ita membru governu sira mak tenke ba koalia esplika buat ne’ebe lolos ba sira atu sira hakarak simu vasina,” nia hateten iha Kampung Alor, Dili.
Nia dehan obstaklu ida mak geografia ema hela do’ok tebes husi fasilidade saúde, liu-liu ferik katuas sira difisil asesu no ekipa saúde mos hasoru dezafiu atu lao tuir komunidade sira.
Nia hateten prezensa membru governu nian iha baze hatudu iha atinjimentu ne’ebe diak tebes iha munisipiu sira hanesan munisipiu Covalima dose dahuluk atinji ona 82.9% dose daruak atinji 53.1%, munisipiu Viqueque dose dahuluk atinji 81% no dose daruak atinji 51.5%, munisipiu Dili dose dahuluk iha 80% no dose daruak 71.4% no munisipiu seluk dose dahuluk atinji ona 50% ba leten.
Entretantu, Membru Parlamentu, Deputado Gabriel Soares preokupa membru governu sira halo kampanha vasinasaun Covid-19 iha postu administrativu Letefoho munisipiu Ermera koalia fali problema estrada, bee moos la koalia konaba importansia vasina atu konvense komunidade simu vasina.
“Ami nia feskalizasaun besik hela ho membru governu balun halo kampanha vasinasaun iha Ermera parte Letefoho nian, afinal sira ba lahalo kampanha vasina sira koalia fali estrada aat, bee moos laiha, aumenta subsidiu ba xefe suku sira oinsa populasaun laran monu simu vasina,” nia hateten.
Iha parte seluk, Reprejentante UNICEF iha Timor-Leste, Bilal Durrani hateten governu Timor-Leste nia asaun kritiku no isin moris hodi hapara transmisaun Covid-19 hetan apresiasaun iha nivel internasional.
“Timor –Leste laos deit atinji ona 64.4% husi populasaun idade tinan 18 ba leten mak simu ona pelumenus vasina dose dahuluk, ita mos redus ona ho susesu propagasaun ka transmisaun virus ne’e molok variante Delta aumenta sa’e iha fulan Agostu,” nia hateten.