Sexta, Janeiro 21, 2022

Presidente Kámara Komérsiu Indústria Timor-Leste (CCITL), Oscar Lima preokupa ema estranjeiru sira rame-rame mai halao atividade komersio ki’ik sira iha rai laran hanesan faan martabak, suku roupa no seluk tan, ne’ebe Timoroan iha kapasidade no abilidade atu halo.

Presidente Kámara Komérsiu Indústria Timor-Leste (CCITL), Oscar Lima preokupa ema estranjeiru sira rame-rame mai halao atividade komersio ki’ik sira iha rai laran.

Nia dehan governu tenke kontrola atividade komersio ki’ik sira ne’e husik ba Timoroan sira mak halao atu osan ne’ebe iha sirkula iha rai laran.

“Ita nia agora nakloke demais halo ita nia empreza nasional ki’ik sira la tahan enfrenta iha terenu tanba kios ki’ik sira fo hotu ba ema sira. Hau lakonkorda no hau sei koalia to’o iha ne’ebe deit,” nia hateten iha Hotel Novu Turismo, Dili.

Nia hateten iha nasaun seluk hanesan Australia ho osan $500,000 seidauk bele tau empreza ida iha ne’eba, maibe iha Timor sei enfrenta limitasaun oioin nakloke ba ema atu mai halao atividade komersio ki’ik sira.

Nia hatutan ema estranjeiru sira bele mai halo investimentu iha rai laran, maibe atividade komersio ki’ik sira hanesan suku roupa, faan martabak, loke loja ne’e husik ba Timoroan sira atu halao.

Iha parte seluk, Diretur Executivu Servisu Rejistrasaun no Verifikasaun Emprezarial Instituisaun Publika (SERVE, I.P) Florêncio da Costa Sanches hateten ema barak bele kestiona, maibe konstituisaun RDTL hateten Timor-Leste aplika merkadu livre no lei sosiedade komersial numeru 10/2017 ne’ebe regula atividade komersio iha rai laran mos fo dalan tanba ne’e konforme kualidade produtu.

Nia dehan lei sosiedade komersial hateten ema ida deklara $1 autokonsentivu bele halao ona atividade komersial iha rai laran, maibe diferente ho investimentu.

“Atividade komersio no investimentu lahanesan. Koalia konaba investimentu ne’e ita iha lista negativu ne’ebe dehan bele ou labele ema estranjeiru halo, maibe atividade komersial ne’e garantia iha konstituisaun ita labele ses,” nia hateten.

Nia hateten tuir lei sosiedade komersial numeru 10/2017 fo dalan ba ema nasional no estranjeiru deklara $1 atu halao atividade komersial iha rai laran, maibe investimentu ba Timoroan tenke hahu ho $50,000, ema estranjeiru no Timoroan hamutuk hahu ho $250,000 no ema puru estranjeiru hahu ho $500,000.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04