Sexta, Janeiro 21, 2022

Presidente Cruz Vermelha de Timor-Leste (CVTL), Madalena Hanjan hateten sira kontinua mobiliza rekursu ema, ekipamentu logistika no finanseiru atu apoia governu responde ba situasaun emergensia, liu-liu propagasaun surtu Covid-19 no dezastre naturais ne’ebe akontese iha teritorio tomak.

Presidente Cruz Vermelha de Timor-Leste (CVTL), Madalena Hanjan hateten sira kontinua mobiliza rekursu ema, ekipamentu logistika no finanseiru atu apoia governu responde ba situasaun emergensia.

Nia dehan sira iha voluntario treinadu hamutuk nain 5,000 iha teritorio tomak inklui nain 600 iha munisipiu Dili, ne’ebe preparadu atu responde urgente ba kualker situasaun ne’ebe akontese.

“Agora ami buka hela osan atu mobiliza voluntario sira mak tenke barak liu tan, ne’e mak ami nia preokupasaun. Se governu ema laiha CVTL tun kedas ba fatin sira ne’e apoia tenda no fo ai-han ba ema sira ne’ebe presiza,” nia hateten via telephone.

Nia hateten akontesementu udan bo’ot iha semana kotuk, ekipa voluntario sira hamutuk ho governu halo evakuasaun ba vitima sira ne’ebe sei hela iha lona okos, liu-liu inan isin rua no labarik sira ba iha fatin ne’ebe seguru.

Nia hatutan akontesementu inundasaun iha loron 4 fulan Abril tinan 2021, sira konsegue mobiliza fundu hamutuk 2 milhoens dolar amerikanu hodi apoia governu responde ba situasaun no sira mos aloka osan balun hodi sosa tanke bee moos, lona, bero ki’ik hodi halo evakuasaun ba vitima sira iha situasaun emergensia.

Nia informa sira mos buka hela fundus hodi harii sentru evakuasaun ne’ebe proprio atu akumula vitima sira tanba dadaun ne’e governu rasik seidauk iha fatin evakuasaun ne’ebe dignu atu akumula sidasaun sira ne’ebe afeta husi dezastre naturais.

Iha parte seluk, Diretur Executivu FONGTIL, Daniel Santos do Carmo konsidera governu la seriu atu buka solusaun ba vitima sira, razaun fulan hitu hela iha lona okos, depois udan monu rai fali evakua sira ba fatin kost ne’ebe ladignu tanba laiha odamatna no janela.

“Ita atu koalia asuntu direitu humanu ne’e, konaba oinsa ema moris dignu. Signifika nia iha uma ne’ebe adekuadu katak iha kuartu naton ba ita nia oan sira toba, haris fatin no dapur. Situasaun agora ita nia observasaun hare odamatan no janela laiha, entau prespetiva direitu humanu ladignu ne’e problema seriu,” nia hateten.

Nia hateten governu iha fundu kontijensia, signifika iha kapasidade atu responde ba situasaun emergensia sira, liu-liu hare fatin ne’ebe dignu no seguru ba sidadaun sira hela, laos evakua husi fatin ne’ebe bee sa’e ba fali uma ne’ebe laiha odamatan no janela.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04