Sexta, Janeiro 21, 2022

Agensia USAID liu husi programa Turismu ba Ema Hotu, servisu hamutuk ho kompanhia Telkomcel no kompanhia Heineken, suporta Ministerio Turismu Komersio no Industria (MTKI), hodi kria ona aplikasaun telemovel foun ba viajen nian ho naran GoTimor atu promove industria turismu no kreatividade sira ne’ebe eziste ba ema Timor no estranjeiru sira iha rai laran bele visita.

Agensia USAID liu husi programa Turismu ba Ema Hotu, servisu hamutuk ho kompanhia Telkomcel no kompanhia Heineken, suporta Ministerio Turismu Komersio no Industria (MTKI), hodi kria ona aplikasaun telemovel foun ba viajen nian ho naran GoTimor.

Diretur Nasional Turismu Komunitaria no Kultura, iha MTKI, Moises Tilman hateten tinan ne’e 2021, governu tau osan hodi mellhora infrastruktura bazika iha fatin turismu komunitaria lima iha munisipiu Baucau, Ainaro, Manufahi no Aileu, ne’ebe hare liu ba iha eco-turismu nian tanba valor a’as iha merkadu.

“Aplikasaun foun ne’e diak tebes atu fasilita promove fatin turismu sira iha rai laran. Governu labele lao mesak tenke servisu hamutuk ho parseiru hotu atu lori turismu ne’e ba mundu, ezemplu ita tau imajen iha situs ida tempu ne’e kedas ema hotu bele hare foho no tasi nia furak, entaun bele atrai ema no ema buka tuir fatin ne’e,” nia hateten hafoin partisipa iha serimonia lansamentu aplikasaun GoTimor iha Comoro, Dili.

Nia hateten durante periodu Covid-19 viajen internasional taka governu hamutuk ho parseru sira halo kampanha makas konaba turismu domestika, liu-liu promove fatin turismu lokal sira ne’ebe iha rai laran hodi hasa’e movimentu viajen lokal no gasta osan iha fatin sira ne’ebe ema visita.

Nia hatutan fatin ne’ebe movimentu viajen makas fo benefisiu ba komunidade lokal tanba sira bele hetan rendimentu oituan.

Iha parte seluk, CEO Telcomcel iha Timor-Leste, Yogi Rizkian Bahar hateten setor turismu iha Timor-Leste hanesan osan mutin tanba fatin barak autentiku tebes hanesan tasi Jaco no seluk tan, ne’ebe valor a’as tebes iha merkadu.

Nia dehan governu tenke iha hanoin hanesan setor privado, signifika hamosu politika sira ne’ebe orienta ba merkadu tanba timor iha potensial bo’ot tebes ba industria turismu no industria kreatividade, ne’ebe bele dudu ekonomia rai laran.

“Indonesia iha periodu Covid-19 sira dudu viajen domestika. Entaun forsa ne’ebe forte ba ita mak dudu viajen domestika, signifika ema sira iha Dili bele halo viajen ba Jaco, Atauro, Manufahi no fatin seluk ne’ebe nia bele gasta osan tanba iha sitasaun agora ne’ebe viajen estranjeiru difisil,” nia hateten.

Nia hateten aplikasaun GoTimor bele fasilita informasaun ne’ebe kredivel ba komunidade sira onaba situ turistika sira ne’ebe sira bele gasta osan no komunidade lokal sira mos bele hare oportunidade atu dezenvolve situ turistika lokal sira ne’ebe sei abandona hela.

Nia informa sira prontu atu servisu hamutuk ho governu hodi dezenvolve setro industria turismu no dijitaliza prestasaun servisu atendimentu sira atu bele atrai liu tan ema visita tanba dezafiu ne’ebe timor hasoru mak sei menus situs ne’ebe fo informasaun kredivel ba ema konaba industria turismu lokal, sistema booking no pagamentu sei manual inklui mos konektividade ligadu ho transporte.

Notisia ne’e hadia tiha ona no publika foun. Notisia publika uluk la temi katak USAID, liu husi programa Turismu ba Ema Hotu, kria aplikasaun GoTimor liuhusi servisu hamutuk ho governu Timor-Leste no setor privado. Ba sala refere, editorial TDW la haluha hatoo deskulpa.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04