CNC Asegura Dokumentu Historiku 25,000 Ho Digitalizasaun

Centru Nasional Chega (CNC) asegura ona dokumentu historiku hamutuk 25,000 ho sistema digitalizasaun nune'e labele lakon ka at.

Diretor Ezekutivu CNC, Hugo Maria Fernandes, hateten dokumentu historiku ne'ebe mak CNC asegura durante ne'e hamutuk 50,000 no husi numeru ne'e iha 25,000 dokumentu mak tama ona ba sistema digitalizaun, seluk seidauk.

Nai dehan, dokumentu historiku ne'ebe mak durante ne'e iha CNC fahe ba parte hanesan, hakerek, audiu no dokumentu audivisual.

"Iha 25,000 dokumentu husi tipu tolu ne'e mak ita tau ona ba sistema digitalizasaun hodi asegura labele at no lakon iha situasaun saida deit mak ita sei hasoru iha futuru," Diretor Ezekutivu CNC Fernandes hateten.

Nia dehan, dokumentu hotu ne'ebe mak iha CNC importante tanba elabora husi historia pasadu ba prosesu konstrusaun libertasaun nasaun Timor-Leste nian.

"Molok to'o 2023 dokumentu historiku ne'e ita hatama hotu ona iha sistema dizitalizasaun ba ema hotu ne'ebe atu asesu bele liu husi plataforna online tantu iha rai liur ka rai laran," nia hateten.

Nia dehan, Centru Nasional Chega (CNC) mos halo ona bibloteka nune'e ba sira ne'ebe iha Timor hakarak asesu direta ba dokumentu sira bele liu husi bibloteka ne'ebe mak prepara ona.

Enkuantu orsamentu ba halo sistema digitalizasaun ba dokumentu historiku ne'e ho montante 5 milhoens dolar americanu.

Entretantu, Deputadu Jose Agustinho Seguera Somotxo hateten, asegurasaun dokumentu historiku nasaun nian ho sistema digitalizasaun ne'e meios ida ne'ebe mak diak tebes tanba agora mos tama ona ba mundu globalizasaun ba iha ne'ebe deit bele asesu ba dokumentu historiku sira.

"Parte ida mos bele asegura husi situasaun sira hanesan foin akontese lalaia inundasaun no akontesimentu sira seluk tan bele garante katak ita nia dokumentu sira seguru hela," nia hateten.

Tanba ne'e agradese tebes ba Centru Nasional Chega (CNC) tanba bele halo ona politika ida digitalizasaun hodi rai dokumentu historiku ho seguru.