- Publika iha: 20 Janeiro 2022
Xefe Departamentu Pecuaria, iha Diresaun Servisu Agrikultura Munisipiu Dili, Marcelino Mendonça Pereira, informa iha tinan 2021, sira rejistu fahi hamutuk 1,106 mak mate, no kontinua simu keixa husi komunidade sira tanba numeru fahi mate aumenta.
Nia dehan iha virus rua ne’ebe afeta komunidade sira nia fahi mak virus Hog Cholera no virus African Swine Fever (ASF) tanba seidauk iha vasina no tratamentu ba moras ASF, ne’ebe afeta komunidade nia fahi.
“Ba moras ASF ita laiha vasina, ita so iha mekanismu ida hakiak animal tenke iha luhan, fo aihan ne’ebe ita rasik prepara laos aihan restu ne’ebe foti husi restorante sira tanba ita lahatene moras ASF ne’e bele mai husi produtu animal sira ne’ebe ita hatama husi rai seluk,” nia hateten iha servisu fatin Matadoru, Dili.
Nia hateten servisu atendimentu saúde animal ne’ebe sira fornese mak vasinasaun atu fo imunidade ba animal sira hasoru moras, ne’ebe tuir kalendario ne’ebe iha dalahat iha tinan ida, no halo tratamentu ba moras animal nian ho antibiotika.
Nia hatutan animal ne’ebe saúdavel sei iha produsaun naan ne’ebe saúdavel no seguru ba populasaun sira atu konsumu tanba ne’e servisu atendimentu saúde animal importante tebes.
Iha parte seluk, Diretora Nasional Veterinaria, iha Ministerio Agrikultura no Peskas, Doutora Joanita Bendita da Costa Jong, hateten governu kria ona komisaun interministerial ida hodi halo aproximasaun saúde ida atu hare konaba kualidade produtu animal sira ne’ebe iha rai laran no tama husi rai seluk hodi asegura populasaun asesu ba produtu animal ne’ebe seguru.
Nia dehan problema ne’ebe mundu enfrenta mak resistensia antibiotika ba animal tanba ne’e produtu animal sira ne’ebe tama mai rai laran tenke asegura seguru hodi labele prejudika saúde publika ema nian.
“Ami mos sei kolabora ho Institutu Menzies, Australia, halo hela vijilansia ba produtu animal ne’ebe tama mai halo teste hodi hare nia resistensia antibiotika iha animal sira. Iha ita nia rai la uza growth promotor halo animal bo’ot lalais, maibe iha nasaun barak sira uza atu halo animal bo’ot lalais no produtu ida ne’e kontein antibiotika,” nia hateten.
Nia dehan governu mak importa aimoruk antibiotika ba animal sira no governu halo kontrola makas ba utilizasaun to’o iha baze tanba ne’e asegura animal sira ne’ebe hetan ona tratamentu antibiotika ema labele konsumu.